Dünya neft ehtiyatları sürətlə tükənir: qiymətlərdə kəskin sıçrayış riski artır - "Bloomberg:

Bizi sosial şəbəkələrdən izləyin:

Yaxın Şərqdəki müharibə və tədarük böhranı qlobal enerji bazarını kritik həddə yaxınlaşdırır...

Dünya neft ehtiyatları Yaxın Şərqdəki müharibə fonunda rekord sürətlə azalır. Görünən ehtiyatlar artıq 2018-ci ildən bəri ən aşağı səviyyəyə yaxınlaşır.

Moderator.az xəbər verir ki, bu barədə "bloomberg.com" nəşri yazıb.

Qlobal ehtiyatlarda sürətli azalma

"Morgan Stanley"-in hesablamalarına görə, martın əvvəlindən aprelin sonuna qədər qlobal ehtiyatlar gündəlik orta hesabla 4,8 milyon barrel sürətlə azalıb. Bunun böyük hissəsi xam neftin payına düşür. Analitiklər xəbərdarlıq edirlər ki, bu meyl bazarı uzun müddət həssas vəziyyətdə saxlayacaq və hətta münaqişə bitsə belə, sabitlik dərhal bərpa olunmayacaq.

Regional çatışmazlıq və kritik hədd təhlükəsi

Ən ciddi vəziyyət idxaldan asılı olan Asiya ölkələrində müşahidə edilir. İndoneziya, Vyetnam, Pakistan və Filippin kimi dövlətlərdə ehtiyatların bir ay ərzində kritik səviyyəyə düşə biləcəyi bildirilir.

Eyni zamanda Avropada aviasiya yanacağı ehtiyatları da kəskin azalır. Yay mövsümünün yaxınlaşması fonunda bu, əlavə risk yaradır. ABŞ-da da vəziyyət sabit deyil: distillat ehtiyatları 2005-ci ildən bəri ən aşağı səviyyəyə enib, benzin ehtiyatları isə 2014-cü ildən bəri mövsümi minimumlara yaxınlaşıb.

Geosiyasi risklər və qiymət təzyiqi

Əgər Hörmüz boğazı üzərindən tədarük bərpa olunmasa, dünya neft sistemi "operativ minimum" həddinə düşə bilər. Bu isə qlobal enerji infrastrukturunun işləməsi üçün kritik səviyyədir.

"Chevron" rəsmisi Eymar Bonner bildirib ki, bəzi ölkələr iyun-iyul aylarında ciddi yanacaq çatışmazlığı ilə üzləşə bilər. Artıq 400 milyon barrel fövqəladə ehtiyatın bazara çıxarılması planlaşdırılır.

Yaxın Şərqdəki gərginlik nəticəsində Brent nefti 58 faiz bahalaşıb. ABŞ prezidenti Donald Tramp isə qiymətlərin 200-250 dollar/barel səviyyəsinə qədər yüksələ biləcəyini istisna etməyib və bu artımı geosiyasi proseslərin "qaçılmaz nəticəsi" kimi dəyərləndirib.