"Putinin "qələbə paradı" Rusiyanın tükənməsini göstərən sarsıdıcı nümayişinə çevrildi - "The Telegraph"

Bizi sosial şəbəkələrdən izləyin:

"Moskvanın hərbi şousu fonunda artan təzyiqlər və resurs çatışmazlığı diqqət çəkib..."

Qırmızı meydandakı 9 May paradı bu dəfə güc nümayişi deyil, Rusiyanın zəifləməsinin açıq göstəricisi kimi qiymətləndirildi.

Moderator.az xəbər verir ki, bu barədə "The Telegraph" nəşri yazıb.

Hərbi ekspert Hemiş de Breton-Qordon yazır ki, Kreml əvvəlki illərdə olduğu kimi bu dəfə nə raket, nə də ciddi hərbi texnika nümayiş etdirə bildi. Ekspertin sözlərinə görə, köhnə təyyarələrin rəmzi uçuşu belə Rusiya ordusunun resurslarının Ukrayna cəbhəsində sürətlə tükəndiyini gizlədə bilmədi.

Texnika çatışmazlığı, müttəfiqlər və diplomatik təcrid

Məqalədə qeyd olunur ki, regional paradlarda İkinci Dünya müharibəsi dövrünə aid tanklar görünür və bu, müasir texnika çatışmazlığının nəticəsidir. Minlərlə müasir zirehli texnikanın Ukraynada məhv edildiyi üçün köhnə modellərin yenidən istifadəyə qaytarıldığı bildirilir.

Paradda Şimali Koreya hərbçilərinin iştirakı da diqqət çəkib. Bu, Rusiyanın artıq müstəqil hərbi güc kimi deyil, xarici avtoritar müttəfiqlərdən asılı vəziyyətə düşdüyünü göstərir.

Diplomatik müstəvidə isə vəziyyət daha da aydın görünür: Putinlə yanaşı az sayda lider iştirak edib, Çin lideri Si Tzinpin isə paradda olmayıb. Bu, Pekinin Moskva ilə məsafəli davranmağa başladığını göstərir.

İtkilər, statistikalar və Putinin çıxışı

Eyni zamanda Ukraynada Rusiya ordusunun itkilərinə dair yeni məlumatlar açıqlanıb. BBC və "Mediazona"nın araşdırmasına görə, 216 mindən çox rus hərbçisinin kimliyi təsdiqlənib, real rəqəmin isə 332 mindən 480 minə qədər ola biləcəyi bildirilir.

Təkcə Başqırdıstan və Tatarıstandan olan itkilər SSRİ-nin 10 illik Əfqanıstan müharibəsindəki ümumi itkilərini artıq keçib. Putin isə parad zamanı texnikanın azlığını təhlükəsizlik və Ukrayna qüvvələrinin məğlubiyyətinə fokuslanma ilə izah edib, həmçinin müharibənin yaxın zamanda bitəcəyini və onun başlanma səbəblərinə dair əvvəlki narrativini yenidən təkrarlayıb.