Kruiz gəmisində ölümcül virus yayılıb: Kanar adaları layneri qəbul etmək istəmir - BBC

Bizi sosial şəbəkələrdən izləyin:

Virusun insandan insana keçmiş ola biləcəyi ehtimal edilir...

Nadir və ölümcül hantavirusun yayıldığı "MV Hondius" kruiz gəmisi ətrafında narahatlıq artır. Kanar adalarının rəhbərliyi İspaniya hökumətinin layneri qəbul etmək qərarına etiraz edib. Hazırda gəmi Kabo-Verde sahillərində lövbər salıb və göyərtədə sərt təhlükəsizlik tədbirləri tətbiq olunur.

Moderator.az xəbər verir ki, bu barədə "bbc.com" nəşri yazıb.

"Bu qərarın texniki əsası yoxdur"

Kanar adalarının prezidenti Fernando Klaviho bildirib ki, İspaniyanın gəmini qəbul etmək qərarı kifayət qədər əsaslandırılmayıb. Onun sözlərinə görə, sərnişinlərin bir neçə gün dəniz yolu ilə Kanar adalarına gətirilməsi məntiqsizdir.

Klaviho hesab edir ki, əgər sərnişinlər təhlükəsiz vəziyyətdədirlərsə, onların birbaşa Kabo-Verde beynəlxalq hava limanından ölkələrinə göndərilməsi daha doğru olar. O, məsələ ilə bağlı İspaniyanın baş naziri Pedro Sançeslə təcili görüşmək istədiyini də açıqlayıb.

Virus artıq bir neçə ölkə vətəndaşında aşkarlanıb

"MV Hondius" gəmisində indiyədək üç nəfər həyatını itirib - Niderlanddan olan ər-arvad və bir Almaniya vətəndaşı. Rəsmi olaraq hantavirus yalnız niderlandlı qadında təsdiqlənsə də, sonradan digər sərnişinlərdə də yoluxma halları aşkarlanıb.

Çərşənbə günü daha üç nəfər gəmidən təxliyə olunub. Onların Böyük Britaniya, Niderland və Almaniya vətəndaşları olduğu bildirilib. Bundan əvvəl Cənubi Afrika və İsveçrədə də həmin laynerin sərnişinlərində virus aşkarlanıb.

"Virus nadir halda insandan insana keçir"

Ümumdünya Səhiyyə Təşkilatı hesab edir ki, gəmidə virusun insandan insana keçməsi ehtimalı var. Bununla belə, təşkilat belə yoluxma mexanizminin çox nadir hallarda baş verdiyini və gəmidə qalan təxminən 150 sərnişin üçün riskin aşağı olduğunu bildirir.

Mütəxəssislərin fikrincə, ilkin yoluxma gəmidəki gəmiricilərdən və ya marşrut boyunca dayanılan adalardan birində baş verə bilər. Daha sonra isə yaxın təmas və eyni kabinələrdə qalma səbəbindən virus bəzi sərnişinlər arasında yayılmış ola bilər.

Hazırda gəmidə sərt sanitar qaydalar tətbiq olunur, sərnişinlərin sahilə çıxmasına isə qadağa qoyulub.