"Putin zəifliyini gizlətməyə çalışır": Kreml yenidən "Sarmat" və "Oreşnik"lə hədələyir" - ISW

Bizi sosial şəbəkələrdən izləyin:

"9 May paradı fiaskosu və cəbhədəki uğursuzluqlar fonunda Moskva raket ritorikasını gücləndirir..."

Rusiya prezidenti Vladimir Putinin son raket bəyanatları dünya mediasında geniş müzakirələrə səbəb olub.

Moderator.az xəbər verir ki, bu açıqlamalar ABŞ-dakı Müharibənin Öyrənilməsi İnstitutunun (ISW) hesabatında təhlil edilib.

9 May paradı Kremlin zəifliyini göstərdi

Analitiklərin fikrincə, bu açıqlamalar həm daxili zəifliyin örtülməsi, həm də Ukrayna cəbhəsindəki uğursuzluqlardan diqqətin yayındırılması məqsədi daşıyır. ISW bildirir ki, Putinin "Sarmat" və digər strateji silahlarla bağlı sərt ritorikası Rusiyanın real hərbi zəifliyini pərdələməyə yönəlib.

Ukraynanın uzaqmənzilli hücumları Rusiyanın dərin arxa cəbhəni, o cümlədən Moskvanı tam qoruya bilmədiyini göstərib. Bu səbəbdən 9 May paradı əvvəlki illərlə müqayisədə daha məhdud keçirilib. Analitiklərə görə, Kremlin Ukraynadan paradın vurulmaması ilə bağlı dolayı təminat istəməsi də bu zəifliyin göstəricisi olub.

Cəbhədə təşəbbüs zəifləyir

ISW qeyd edir ki, 2025-ci ilin sonundan Rusiya ordusunun irəliləyişi sürətlə zəifləyib, bəzi istiqamətlərdə hətta lokal itkilər qeydə alınıb. 2026-cı ilin əvvəlindən isə canlı qüvvə itkiləri artıq tam kompensasiya edilmir.

Eyni zamanda, 2026-cı ilin yaz-yay hücumları da ciddi nəticə verməyib. Ukrayna isə bir neçə istiqamətdə əks-hücumlarla təşəbbüsü ələ alıb — Kupyanskın bir hissəsi geri qaytarılıb, cənubda isə yüzlərlə kvadrat kilometr ərazi azad edilib.

Putinin narrativi reallıqla üst-üstə düşmür

Analitiklərin fikrincə, Putin "Sarmat", "Oreşnik", "Kinjal" kimi silahlarla güc nümayişi etməyə çalışsa da, döyüş meydanındakı meyllər fərqlidir. Ukrayna müdafiəsi dayanmaqla yanaşı bəzi sahələrdə təşəbbüsü də ələ alıb.

Rusiya isə yüksək itkilər fonunda məhdud irəliləyiş əldə edir. ISW-nin qənaətinə görə, Kremlin hazırkı raket ritorikası daha çox siyasi və psixoloji təsir məqsədi daşıyır, real hərbi üstünlüyü isə əks etdirmir.