“O gün bütün insanları öz başçılarıyla birgə çağıracağıq...”- "...bütün gizli sirlər açılacaq..."

Gürcüstanı qarşıdurmaya çəkən prezident Zurabişvilidir, yoxsa?..- Analitik cavablandırır...

"Ukrayna Putinə zərbə endirəcək ballistik raketi əldə etməyə çox yaxındır" - "The Telegraph"

"Sizə təşəkkür etməyi özümə mənəvi borc bildim" - OXUCU TƏBRİKİ

"Trampın qələbəsi Ukrayna üçün kazino oyununu xatırladacaq" - "The Guardian"

"İran Almaniya vətəndaşlarını girov götürür" - Almaniya XİN

“O gün bütün insanları öz başçılarıyla birgə çağıracağıq...”- "...bütün gizli sirlər açılacaq..."

Ekskluziv

Oxunub: 4274

14 Apr 2023 | 05:02

“O gün bütün insanları öz başçılarıyla birgə çağıracağıq...”-

“Bu dünyada döyülən, söyülən, haqqı yeyilən, bu dünyada haqqını almağa aciz qalan hər kəs əmin olsun ki, o dünyada öz haqqını alacaqdır…”

Axirətə niyə inanmalıyıq? - II hissə

“Üstü açılmamış bütün cinayətlər, bütün şərlər, pisliklər o aləmdə çözüləcək və cəzası veriləcək…”

İKİNCİSİ: AXİRƏTƏ OLAN EHTİYACIMIZ

(Əvvəli burada://moderator.az/az/ekskluziv/624028/her-bir-insan-zu-de-bilmeden-axiret-alemini-cenneti-arzulayir/ )

“Əgər zalım bu dünyada istədiyini edər, zülm edər və zülmünün qarşılığını görməzsə, eynilə də möminlər etdikləri yaxşılıqların qarşılığını almasalar, bu Allahın ədalətinə zidd olar…”

– Axirət həyatı, həmçinin, bir əxlaqi zərurətdir. Əmanətə xəyanət etməyən və həmişə düz danışan bir kimsə bu gözəl əxlaqa yalnız axirətdə bunun qarşılığını görmək və Allahın razılığını qazanmaq üçün riayət edir. Həmçinin, başqa bir çox gözəl əxlaqlar axirət yurdu naminə edilir. İnsan əxlaqını gözəlləşdirərək axirət dünyasında bunun nəticəsini görmək istəyir.

Ona görə də ateistlərdə əxlaq nisbi olduğu üçün, onlar əxlaq barədə qəribə sözlər danışırlar. Bu barədə «ateizmdə əxlaq anlayışı» mövzusuna toxunarkən ətraflı danışmışıq.

– Peyğəmbərlər və Elçilərin diriliş və hesab günü barədə xəbər verməsi:

Allah öz peyğəmbərlərini və elçilərini saf əqidə və sadiq dəvətlə göndərmişdir. O dəvət ki, insanların sağlam fitrəti və ağlı ilə uyğun gəlir. Allah o peyğəmbərlərə əlamətlər, nişanələr və möcüzələr də verərək onları qüvvətləndirmiş, Onun tərəfindən göndərilən elçilər olduqlarını insanlara göstərmişdir. Bütün peyğəmbərlər öz qövmlərinə insanın yenidən diriləcəyi və etdiyi əməlləri barəsində barədə haqq-hesab olunacağı barədə məlumatlar vermiş, buna inanmağın zəruriliyini bildirmişlər. Budur, İbrahim Peyğəmbər də öz qövmünə belə demişdir:

«O Rəbb ki, məni öldürəcək, sonra dirildəcəkdir. O Rəbb ki, Haqq-hesab günü xətalarımı bağışlayacağını Ondan umuram.» (əş-Şuara, 81)

Başqa peyğəmbərlər də bu xəbəri öz qövmlərinə vermişlər.

– Allahın hikməti və ədaləti ölümdən sonrakı həyatı gərəkli edir:

Allahın hikmətindəndir ki, dünya həyatından sonra başqa bir həyat yaratsın və hər bir insan etdiyi əməllərin qarşılığını görsün. Çünki bu dünya əməl dünyasıdır. Allah bəzi əməllərin qarşılığını dünyada versə də, elə əməllər vardır ki, gizli qalır, istər yaxşı, istər də pis əməl. Allah cəzasını dünyada almayan pis əməl sahiblərinin cəzasını da, üstü açılmamış gizli yaxşılıqların mükafatını da haqq-hesab günü verəcəkdir. Dedik ki, dünya əməl məkanı, axirət isə haqq-hesab məkanıdır. Üstü açılmamış bütün cinayətlər, bütün şərlər, pisliklər həmin aləmdə çözüləcək və cəzası veriləcək. Uca Allah buyurur:

«O gün (gizli qalan bütün) sirlər açılacaqdır»... (ət-Tariq, 9)

Bu ayədən əvvəl isə, eyni surədə bu ayələr keçir:

«Qoy insan nədən yaradıldığına bir baxsın! O, süzülüb tökülən bir mayedən yaradılmışdır. Bu maye bel və köks sümükləri arasından çıxır».

Sonra isə növbətli ayədə Allah buyurur:

«Şübhəsiz ki, Allah onu dirildib qaytarmağa qadirdir.» (ət-Tariq, 5-8)

Əgər zalım bu dünyada istədiyini edər, zülm edər və zülmünün qarşılığını görməzsə, eynilə də möminlər etdikləri yaxşılıqların qarşılığını almasalar, bu Allahın ədalətinə zidd olar. Ona görə də, bu ziddiyyət qətiyyən mümkün deyildir və Allah Özü haqq-hesab günü ədaləti bərqərar edəcəyini, zülmün və yaxşılığın qarşılığının veriləcəyini bildirmişdir:

«O gün bütün insanları öz başçıları ilə birlikdə çağıracağıq. O zaman kitabı sağ əlinə verilən kimsələr öz kitablarını sevinclə oxuyacaq və onlara xurma çəyirdəyindəki lif qədər zülm edilməyəcəkdir». (əl-İsra, 71)

Odur ki, bu dünyada döyülən, söyülən, haqqı yeyilən, bu dünyada haqqını almağa aciz qalan hər kəs əmin olsun ki, o dünyada öz haqqını alacaqdır. Onların haqqından xurma çəyirdəyi üzərindəki bir nazik lif qədər də keçilməyəcək, zülm olunmayacaq. Allah öz qulları üçün bu hikmətli və ədalətli tədbiri görmüşdür!..