"Mossad" ətrafında qalmaqal: Netanyahu ilə Barnea üz-üzə gəldi" - İsrail mətbuatı

"İsrailin əsas kəşfiyyat qurumunda yeni rəhbər təyinatı siyasi və hüquqi qarşıdurmaya çevrilib..."

İsraildə Baş nazir Binyamin Netanyahu ilə hazırkı "Mossad" rəhbəri Dadi Barnea arasında ciddi mübahisə yaranıb. 

Moderator.az xəbər verir ki, bu barədə "newsru.co" nəşri məlumat yayıb.

"Mossad" rəhbərliyi uğrunda açıq qarşıdurma

Nəşr yazır ki, buna səbəb Netanyahu tərəfindən general Roman Hofmanın kəşfiyyat xidmətinin yeni rəhbəri postuna namizəd göstərilməsidir. İsrail mediasının yaydığı məlumata görə, Barnea hökumətin hüquq müşavirinə və Ali Məhkəməyə göndərdiyi məktubda Hofmanın təyinatına qarşı çıxıb.

O bildirib ki, məsələ təkcə namizədin peşəkar təcrübəsi və ya kəşfiyyat sahəsindəki çatışmazlıqları ilə bağlı deyil. Barnea əsas təhlükənin "Mossad" kimi demək olar ki, tam qapalı və xarici nəzarətsiz fəaliyyət göstərən struktur daxilində yarana biləcəyini vurğulayıb.

"Mossad qanunsuz zonada işləyir"

Barnea məktubunda "Mossad"ın fəaliyyət prinsiplərinin digər Qərb xüsusi xidmət orqanlarından fərqləndiyini qeyd edib. Onun sözlərinə görə, təşkilat bir çox əməliyyatları xarici ölkələrin qanunlarına zidd şəkildə həyata keçirir və geniş "boz zona" daxilində fəaliyyət göstərir.

Bu səbəbdən quruma rəhbərlik edən şəxsin yüksək mənəvi keyfiyyətlərə malik olmasının vacibliyi vurğulanıb. Barnea hesab edir ki, Hofmanın adı azyaşlı Uri Elmakaysla bağlı qalmaqalda hallandığı üçün onun təyinatı gələcəkdə həm dövlət, həm də əməkdaşlar üçün risk yarada bilər.

"Onu mən təyin edirəm"

Netanyahu isə ittihamları sərt şəkildə rədd edib. Baş nazir bildirib ki, "Mossad" rəhbərini yalnız hökumət başçısı təyin edə bilər: "Nə hüquq müşaviri, nə də məhkəmə bu qərarı verə bilməz. Roman Hofman cəsur, təşəbbüskar və döyüş təcrübəsinə malik komandirdir", - deyə Netanyahu vurğulayıb. Baş nazir əlavə edib ki, Hofman 7 oktyabr hücumları zamanı HƏMAS silahlıları ilə döyüşdə ağır yaralanıb və İsrail təhlükəsizliyi üçün mühüm xidmət göstərib.

"Sovet İttifaqından gəldiyi üçünmü?"

Netanyahu çıxışında Hofmanın keçmiş SSRİ-dən repatriasiya olunmasını da gündəmə gətirib. O sual edib ki, namizədə qarşı müqavimətin səbəbi onun "öz çevrələrindən olmaması", yoxsa Sovet İttifaqından köçməsi ilə bağlıdır.

Müxalifətdəki bəzi qüvvələr də Hofmanı müdafiə edib. Xüsusilə "Yisrael Beiteinu" partiyasının lideri Aviqdor Liberman onu "Mossad" üçün uyğun namizəd

adlandırıb. Hazırda məsələ ilə bağlı yekun qərarın İsrail Ali Məhkəməsi tərəfindən veriləcəyi gözlənilir.