"Real Madrid"də prezidentlik qalmaqalı: Klub namizədin ittihamlarına cavab verdi

Bizi sosial şəbəkələrdən izləyin:

"Real Madrid" klubu prezidentliyə namizəd Enrike Rikelmenin qalmaqallı açıqlamalarına sərt reaksiya verib.

Moderator.az xəbər verir ki, klubun rəsmi saytında bununla bağlı bəyanat dərc olunub.

Qeyd edək ki, ispaniyalı iş adamı "Kral Klubu"nun rəhbəri vəzifəsinə keçiriləcək seçkilərin şəffaflığını şübhə altına alaraq, bu prosesi Venesueladakı kommunist diktaturası ilə müqayisə etmişdi.

Klubun bəyanatında isə yazılıb:

"Namizəd Enrike Rikelmenin yalnız bir namizədin klub üzvlərinin siyahısına çıxışı olması barədə iddialarına, eləcə də poçt vasitəsilə verilən səslərin qorunmasına dair ifadə etdiyi şübhə və etimadsızlığa cavab olaraq, Seçki Komissiyası aşağıdakıları bəyan edir:

1. Seçki Komissiyası 7 iyun seçkilərində iştirak edən heç bir namizədə klub üzvlərinin siyahısını təqdim etməyib.

2. Seçki Komissiyası hər iki namizədə məlumat, sənəd və materialların klub üzvlərinə göndərilməsi qaydası barədə yazılı şəkildə məlumat verib. Bundan əlavə, namizəd Enrike Rikelme namizədliyini irəli sürdüyü gün bu prosedurla bağlı şəxsən məlumatlandırılıb.

3. Həmin prosedur məhz bu məqsədlər üçün dərc olunmuş seçki prosesini tənzimləyən reqlamentlə (klub üzvlərinin siyahısına dair bölmənin 2-ci bəndi) müəyyən edilib. Qaydalarda açıq şəkildə bildirilir ki, namizədlər klub üzvlərinə göndərmək istədikləri məlumat, sənəd və materialları Seçki Komissiyasına təqdim etməlidirlər, onların yayılmasına isə klub cavabdehdir.

4. Seçki Komissiyası hər bir namizədin klub üzvlərinə göndərmək istədiyi məlumat, sənəd və materialların qəbulu üçün son müddəti 1 iyun, bazar ertəsi, saat 18:00 olaraq müəyyənləşdirib.

5. Seçki Komissiyası Enrike Rikelmenin poçt vasitəsilə göndərilən səslərin saxlanması və təhlükəsizliyini şübhə altına alan açıqlamalarından dərin narahatlıq keçirir. Rikelmenin namizədlik qərargahının bu məsələ ilə bağlı sualına Seçki Komissiyası yazılı şəkildə cavab verib və həmin sənəddən aşağıdakı çıxarışı təqdim edirik:

"Poçt vasitəsilə göndərilən səslərin mühafizəsi prosedurunun şəffaflığına və etibarlılığına inamı artırmaq məqsədilə, arzu edən namizədlər bülletenlərin saxlanması üçün nəzərdə tutulmuş otağın girişinin yaxınlığında daim olmaq şərtilə müvafiq qaydada akkreditə olunmuş bir müşahidəçi təyin edə bilərlər. Müşahidəçilərin bu ərazidə iştirakı klub obyektlərinin mövcud nəzarət və təhlükəsizlik sistemləri çərçivəsində həyata keçiriləcək və qüvvədə olan qanunvericiliyə uyğun olaraq videomüşahidə və təsvirlərin işlənməsi üzrə cari normalara tabe olacaq".

6. Beləliklə, hər hansı namizəd tərəfindən klub üzvlərinə göndərilən bütün məlumat, sənəd və ya materiallar qüvvədə olan prosedur və qaydalara tam uyğun olaraq işlənib.

7. Seçki Komissiyası bütün bu seçki prosesi ərzində müvafiq qaydalara ciddi və dəqiq şəkildə əməl edir və buna görə də bu prosesə hörmətlə yanaşılmasını xahiş edir".

Qeyd edək ki, daha əvvəl "Real Madrid" klubu prezident seçkilərinin 7 iyunda baş tutacağını elan etmişdi. /Oxu.az/