Komitədən Moderator.az-a verilən məlumata görə, təqdimat Dünya Gənc Türk Yazarlar Birliyinin təşkilatçılığı, Azərbaycan Respublikası Gənclər Fondunun dəstəyi ilə həyata keçirilən “Türk dünyasından Şuşaya– Şuşadan Türk dünyasına” adlı layihə çərçivəsində Azərbaycanda səfərdə olan Türk ölkə və topluluqlarını təmsil edən gənc yazarların iştirakı ilə baş tutub.

 

Komitə sədri önsöz yazdığı kitabın məziyyətlərindən söz açıb, Aygiz Baymuxammetin ədəbi və ictimai uğurlarına ürəkdən sevindiyini deyib:

 

“Uşaqlıq, yeniyetməlik duyğu, düşüncələrini ustalıqla nəsrə çevirən başqurd qardaşımız Aygiz Baymuxammetin “Getmə, ana” povesti dillər əzbərinə dönüb. Əsər neçə dilə çevrilib, neçə dəfə çap edilib, yazarına ödüllər qazandırıb. Belə bir əsərin Azərbaycanda da yayınlanması həm yaxşı bir əsəri dilimizə qazandırmaq baxımından, həm də, Azərbaycan-Başqurd ədəbi-mədəni əlaqələrinin inkişafı baxımından təqdirəlayiq olmuşdur.

 

Dünyanın, özəlliklə, Avrasiyanın çox böyük hissəsini əhatə edən Türk dünyasında ədəbi-mədəni işbirliyinin artan xətt üzrə inkişaf etməkdə olması sevindirici haldır. Qardaş ölkə və topluluqlardan olan müxtəlif yaş qruplarına mənsub yazarlar arasında qarşılıqlı əlaqələr, səfərlər, ədəbi uyğunlaşdırmalar, ortaq icra edilən çoxsaylı ədəbi-mədəni layihələr, əlaqələrimizin zaman keçdikcə daha da inkişaf edəcəyini deməyə əsas verir.

 

DGTYB ilə “Regional Hüquqi və İqtisadi Marifləndirmə” İctimai Birliyinin təqdim etdiyi, qardaş başqurd xalqının ən yeni nəsil istedadlı yazarlarından biri və ötən ildən Başqurdistan Yazıçılar Birliyinin başqanı olan Aygiz Baymuxammetin qələmə almış olduğu bu maraqlı povestin ümumən, qardaş xalqın bir dönəmki yaşantılarına da ayna tutduğunu vurğulamaq istərdim.

 

Bildiyiniz kimi, başqurd ədəbiyyatının klassiklərindən Salavat Yulayoğlu, Şeyxadə Bobiç, Mustay Kərim adları bizlərə daha çox tanışdır. Əslində, zəngin şifahi xalq yaradıcılığı və tatar-başqırd ortaq ədəbi abidələrinin də akademik çevrələrlə məhdudlaşmaması, çağdaş oxucuya geniş surətdə təqdim olunması ümumi işin xeyrinə olardı. Ona görə də, Aygiz Baymuxammetin povestini bu istəklər fonunda yaxşı bir başlanğıc saya bilərik.

 

Bəli, Aygiz Baymuxammet öz doğma vətəni Başqur­dıstanda, bir çox qardaş ölkə və topluluqda ədəbiyyatçılar arasında tanınan, sevilən imzadır. Təsadüfi deyil ki, adıçəkilən əsər Başqurdistanın özündə və Qırğız Respublikasında tədris proqramına daxil edilib.

 

Müxtəlif layihələr çərçivəsində Azərbaycanda da yaradıcılıq səfərlərində olmuş istedadlı başqurd qardaşımızı yenidən Azərbaycanda salamlamaqdan çox şadıq. İnanıram ki, Aygiz Baymuxammetin digər maraqlı əsərləri də zaman-zaman azərbaycancaya çevriləcək və dəyərli dostumuzu yenidən xoş səbəblərlə Azərbaycana dəvət edəcəyik.

 

Müəllif “Getmə, ana!” deyir, qoy, analar getməsin – nə bizim dünyadan, nə bu dünyadan”…

 

Ədəbi-mədəni işbirliyini gücləndirmək üçün bir sıra təkliflərlə çıxış edən Q.Paşayeva, daha sonra A.Baymuxammetə xatirə hədiyyəsi təqdim olunub.

 

Təqdimatda “Getmə, ana” kitabının redaktorları – Ə.Kərim adına Poeziya Evinin direktoru İbrahim İlyaslı, Beynəlxalq “Alaş” Ədəbiyyat mükafatı laureatı Əkbər Qoşalı, əsəri dilimizə çevirmiş Aygün Yaşar, DGTYB başqanı İntiqam Yaşar, Qırğız Respublikasının “Manas” Teatrının direktoru Aziz Bıymırza, Özbəkistan Gənclər İşləri Agentliyinin başqan müavini, şair Mehrinaz Abbas, mərkəzi qərargahı İstanbulda yerləşən “Türk Ədəbiyyatı” Vəqfinin Yazı işləri başqanı Ənvər Aykol, Almatadakı “Türk xalqları arasında ədəbi əlaqələri inkişaf etdirmə vəqfi” başqanı, yazıçı Erkinbek Serikbay çıxış edib, ürək sözlərini bölüşüb.

 

Çıxışlarda xalqlarımız arasında ədəbi-mədəni əlaqələrin daha da genişlənməsində belə layihə, nəşr və təqdimatların roluna vurğu edilib. Natiqlər xalqlar arasında dostluqda, doğmalıqda ədəbiyyatın, mədəniyyətin açar rolu oynadığını, Azərbaycanın bu istiqamətdə apardığı işlərin geniş miqyaslı olduğunu bildirib.

 

“Türk dünyasından Şuşaya– Şuşadan Türk dünyasına” layihəsi çərçivəsində Azərbaycanda səfərdə olan istedadlı gənc yazarların önəmli görüşlərdə və tədbirlərdə iştirak etdiyi, bu kimi görüşlərin yeni ədəbi əməkdaşlıqlara çevriləcəyini inam ifadə olunub.

 

Başqurd Yazıçılar Birliyinin başqanı A.Baymuxammet təqdimat və xoş sözlər üçün təşəkkür edib.

 

Qeyd edək ki, Əli Kərim adına Sumqayıt Poeziya Evində keçirilən mərasimdə Başqurdistan Yazıçılar Birliyinin başqanı Aygiz Baymuxammetin “Getmə, ana” kitabı ilə yanaşı DGTYB-nin yeni nəşri olan “Türk dünyasından Şuşaya– Şuşadan Türk dünyasına” kitabı da Sumqayıt ədəbi ictimaiyyətinə təqdim olunub.

 

Azərbaycan Respublikasının Milli Məclisinin Mədəniyyət Komitəsinin, Sumqayıt Regional Mədəniyyət İdarəsinin, Əli Kərim adına Sumqayıt Poeziya Evinin, “Regional Hüquqi və İqtisadi Maarifləndirmə” İB-nin təşkilatçılığı ilə keçirilən tədbirdə yazıçılar, şairlər, kütləvi informasiya vasitələri, qeyri-hökumət təşkilatları nümayəndələri, şəhərdəki kitabxanaların təmsilçiləri və oxucular iştirak edib.