"Avropa yeni təhlükəsizlik strategiyası qurur: həm nüvə çətiri, həm də Ukrayna planı" - "Financial Times"

"Brüssel bir tərəfdən Rusiyaya qarşı müdafiəni gücləndirir, digər tərəfdən Ukraynanın gələcəyi ilə bağlı uzunmüddətli strategiya hazırlayır..."

Avropa ölkələri təhlükəsizlik sahəsində yeni mərhələyə qədəm qoyur. Həm NATO-nun nüvə imkanlarının genişləndirilməsi, həm də Ukraynaya dəstəyin artırılması Avropanın əsas prioritetlərinə çevrilib.

Moderator.az xəbər verir ki, bu barədə Britaniyanın nüfuzlu "Financial Times" nəşri yazıb.

ABŞ-ın nüvə çətiri genişlənə bilər

Məlumata görə, ABŞ bəzi Avropa ölkələri ilə nüvə silahı daşıya bilən təyyarələrin əlavə NATO üzvlərində yerləşdirilməsi imkanını müzakirə edir. Bu addımın məqsədi Vaşinqtonun adi silahlar sahəsində dəstəyi azaltdığı şəraitdə təhlükəsizlik zəmanətlərinin qüvvədə qaldığını nümayiş etdirməkdir. Xüsusilə Polşa və Baltikyanı ölkələr bu təşəbbüsə maraq göstərirlər.

Onlar bunu Rusiyanın Ukraynaya qarşı müharibəsi və Kremlin nüvə təhdidləri fonunda vacib hesab edirlər. Hazırda ABŞ-ın nüvə paylaşımı proqramı çərçivəsində bir sıra Avropa ölkələrində Amerika nüvə başlıqları yerləşdirilib və onların istifadəsi üzərində tam nəzarət Vaşinqtonda qalır.

Avropa Ukrayna məsələsində təşəbbüsü ələ alır

"The Economist" nəşri yazır ki, Avropa artıq Ukraynaya yardımın əsas yükünü öz üzərinə götürür. Yeni 90 milyard avroluq maliyyə paketinin icrasına başlanılır, eyni zamanda hərbi əməkdaşlıq və Rusiyaya qarşı sanksiyalar genişləndirilir. Nəşrin fikrincə, Ukraynanın son uğurları diplomatik həll ümidlərini də artırıb. 

Bununla belə, Avropa rəsmiləri etiraf edir ki, hələlik Rusiyanı güzəştlərə sövq edəcək aydın strategiya formalaşdırılmayıb. Ekspertlər hesab edir ki, gələcəkdə mümkün sülh razılaşmasının əsas elementlərindən biri Ukraynanın Avropa İttifaqına inteqrasiyasının sürətləndirilməsi ola bilər. Lakin Brüsseldə bunun yaxın illərdə baş verəcəyinə inananlar azdır.

Rusiyaya verilən mesaj

Nəşrin qənaətinə görə, Avropa ABŞ-dan asılılığı azaltmağa və təhlükəsizlik sahəsində daha müstəqil mövqe formalaşdırmağa çalışır. Bir tərəfdən müdafiə imkanları, o cümlədən nüvə çəkindirmə mexanizmləri gücləndirilir.

Digər tərəfdən isə Ukraynanın uzunmüddətli dəstəklənməsi üçün yeni siyasi və iqtisadi planlar hazırlanır. Beləliklə, Brüssel Moskvaya göstərmək istəyir ki, Avropanın təhlükəsizlik siyasəti artıq təkcə Vaşinqtonun qərarlarından asılı deyil və Ukraynaya dəstək yaxın perspektivdə gündəmdən çıxmayacaq.