"Rusiya qələbələrinin dövrü başa çatır": Donbas uğrunda savaşda yeni mərhələ - CNN

"Ukrayna hələ qalib gəlməyib, amma Kreml əvvəlki kimi irəliləyə bilmir..."

Rusiyanın Ukraynaya qarşı müharibəsində yeni mərhələnin konturları görünməyə başlayır. Dron üstünlüyü və əks-hücumlar cəbhədə vəziyyəti dəyişir.

Moderator.az xəbər verir ki, bu barədə CNN telekanalı yazıb.

"Qaçılmaz qələbə" narrativi çat verir

Nəşrə görə, son aylarda ilk dəfə olaraq Rusiya ordusunun irəliləyiş tempi faktiki dayanıb, Ukrayna qüvvələri isə bəzi istiqamətlərdə əraziləri geri almağa başlayıb. Amerikanın Müharibənin Öyrənilməsi İnstitutunun (ISW) məlumatına əsasən, aprel ayında Ukrayna Rusiyanın işğal etdiyi ərazilərdən daha çox torpaq geri qaytara bilib. Bu isə Kremlin uzun müddətdir formalaşdırdığı "qaçılmaz qələbə" obrazına ciddi zərbə sayılır.

Dronlar savaşın qaydalarını dəyişir

Zaporoje yaxınlığında döyüşən Ukrayna pilotsuz sistemlər bölməsinin zabiti Kirill Bondarenko bildirib ki, cəbhədə rus qoşunlarının əhvalı artıq əvvəlki kimi deyil. Onun sözlərinə görə, Rusiya ordusu ciddi şəkildə yorulub və Ukrayna müəyyən mənada savaşın gedişini dəyişə bilib.

CNN yazır ki, əsas dəyişikliklərdən biri Ukraynanın dron sahəsində qazandığı üstünlükdür. İndi Kiyev təkcə ön xətti deyil, həm də Rusiya ordusunun logistika mərkəzlərini, sursat anbarlarını və komanda məntəqələrini hədəfə alır. Bu isə rus qoşunlarının irəliləyişini xeyli çətinləşdirir.

Kreml Donbas planında çıxılmazlıqla üzləşir

ISW analitikləri bildirir ki, Kremlin bütün Donbasın Rusiyaya verilməsi ilə bağlı tələbləri cəbhədəki reallığa uyğun gəlmir. Məlumata görə, Rusiya rəhbərliyi ordudan 2026-cı ilin payızına qədər bütün Donbasın işğalını tələb edir. Lakin institutun hesablamalarına əsasən, Rusiya ordusu ilin əvvəlindən Donetsk vilayətində gündə orta hesabla cəmi 2, 63 kvadratkilometr irəliləyə bilib.

Analitiklər vurğulayır ki, Ukraynanın möhkəmləndirilmiş müdafiə xətləri və əks-hücumları bu planların reallaşmasını son dərəcə çətinləşdirir. CNN yekunda qeyd edir ki, Ukrayna hələ müharibəni qazanmayıb, amma Rusiya artıq əvvəlki kimi qalib görünmür.