Baş ağrısı bu CİDDİ XƏSTƏLİYİN əlaməti imiş

Bir çox insan baş ağrısını yorğunluq, stress və ya yuxusuzluqla əlaqələndirsə də, mütəxəssislər bəzi hallarda bunun ciddi xəstəliklərin xəbərçisi ola biləcəyini bildirirlər. Xüsusilə tez-tez təkrarlanan, şiddətli və qeyri-adi baş ağrıları diqqətdən kənarda qalmamalıdır.

Moderator.az Musavat.com -a istinadla xəbər verir ki, nevroloqların sözlərinə görə, davamlı baş ağrısı yüksək təzyiq, beyin damar problemləri və hətta beyin şişi kimi ciddi xəstəliklərlə əlaqəli ola bilər. Baş ağrısı ilə yanaşı görmədə bulanıqlıq, ürəkbulanma, danışıq pozuntusu və ya bədənin bir tərəfində zəiflik yaranarsa, dərhal həkimə müraciət etmək tövsiyə olunur.

Mütəxəssislər qeyd edir ki, xüsusilə səhərlər daha güclü hiss edilən və zamanla artan ağrılar təhlükəli siqnal hesab edilə bilər. Ani və çox güclü başlayan baş ağrısı isə bəzi hallarda beyin qanaması riskinə işarə edə bilər.

Həkimlər insanların özbaşına ağrıkəsici qəbul etməklə problemi gizlətməsinin təhlükəli olduğunu vurğulayırlar. Uzun müddət davam edən və səbəbi bilinməyən baş ağrılarında müayinədən keçmək vacib sayılır.

Bununla yanaşı, baş ağrılarının böyük hissəsi stress, susuzluq, yuxu pozğunluğu və migrenlə bağlı olur. Lakin simptomların dəyişməsi və ağrının şiddətlənməsi hallarında vaxt itirmədən mütəxəssisə müraciət etmək tövsiyə edilir.