İnsanlığı xilas edəcək SİRR açıldı: 500 il əvvəl Da Vinçi çəkmişdi

Leonardo da Vinçinin 500 il əvvəl bir qeyd dəftərinə çəkdiyi mürəkkəb cizgilərin bu gün müasir tibb dünyasında böyük bir kəşfin qapısını açacağını kim bilə bilərdi? İntibah dövrünün dahisi, təkcə sənəti ilə deyil, insan anatomiyasına olan marağı ilə də dövrünün çox irəlisində idi. 

Moderator.az xarici mediaya istinadla milyonlarla insanın ürək sağlamlığını yaxından maraqlandıran möcüzənin hekayəsini təqdim edir.

Da Vinçinin 500 il əvvəl fərq etdiyi, lakin o dövrdə tam mənalandıra bilmədiyi bir detal, günümüzün genetik və süni intellekt texnologiyaları ilə nəhayət həll olundu. Ürəyin daxilində fraktal quruluşlar, bu gün ürək mərkəzli müalicələrdə yeni bir dövrün qapılarını açıb. Bəs, fraktal quruluş nədir və Da Vinçi bunu necə kəşf etdi?

Leonardo da Vinçi, insan ürəyi üzərində apardığı araşdırmalarda, ürəyin daxili səthini örtən krujeva bənzəri, mürəkkəb bir əzələ toxuması fərq etmişdi. Bu gün tibb dünyasında "trabekul" adlandırılan bu strukturlar, o dövrdə da Vinçinin də diqqətini çəkmişdi. Məşhur dahi, bu liflərin ürəkdən keçən qanı isti saxlamağa yarayan bir sistem olduğunu düşünmüşdü.

Da Vinçinin "isinmə" nəzəriyyəsi müasir tibbdə təsdiqlənməsə də, bu strukturların həyati əhəmiyyət kəsb etməsi barədəki intuisiyaları tam 500 il sonra elmi olaraq sübuta yetirildi.

Alimlər bu sirri həll etmək üçün 18 mindən çox insanın ürək MRT (Maqnit Rezonans Tomoqrafiyası) görüntülərini süni intellekt dəstəyi ilə araşdırdılar. Araşdırmanın ən füsunkar nöqtəsi isə təbiətdə qar dənəciklərində və ya ağac budaqlarında gördüyümüz fraktal nəzəriyyəsinin (öz-özünü təkrar edən mürəkkəb naxışlar) qəlbimizdə də mövcud olduğunun anlaşılması idi.

(lent.az)