"Ukrayna təşəbbüsü ələ keçirir, amma Kreml geri çəkilməyə hazır görünmür" - "The Wall Street Journal"

Bizi sosial şəbəkələrdən izləyin:

"Qarşıdakı aylar müharibənin taleyində dönüş nöqtəsinə çevrilə bilər, amma Putin hələ də Ukraynanın çökəcəyinə inanır..."

Rusiyanın Ukraynadakı vəziyyəti çox pisdir, amma Vladimir Putini geri çəkilməyə məcbur edəcək qədər deyil.

Moderator.az xəbər verir ki, bu barədə "wsj.com" nəşri yazıb.

Ukrayna döyüş meydanında üstünlük qazanıb

Nəşrin fikrincə, qarşıdakı yay ayları Ukraynanın əldə etdiyi məhdud üstünlüyü strateji dönüş nöqtəsinə çevirib-çevirə bilməyəcəyini göstərəcək. Son aylarda Ukrayna ordusu say baxımından üstün olan Rusiya qüvvələrinin fəaliyyətini ciddi şəkildə məhdudlaşdıra bilib. Ukrayna hərbçiləri həm taktiki, həm də texnoloji baxımdan müəyyən üstünlük əldə ediblər. Bununla belə, analitiklər hesab edir ki, müharibənin taleyində dönüş nöqtəsinin artıq baş verdiyini demək hələ tezdir.

Rusiya zəifləyir, Ukrayna isə yeni taktikalara keçir

2026-cı ildə Rusiya ordusunun irəliləyiş tempi son iki ilin ən aşağı səviyyəsindədir. Analitiklərin hesablamalarına görə, Rusiya hər ay 35 minə qədər ölü və yaralı verir. Ukrayna briqadaları rus ordusunun ötən il geniş istifadə etdiyi sızma taktikasına qarşı daha effektiv mübarizə aparmağa başlayıb. Dronlar və xüsusi təmizləmə qrupları vasitəsilə cəbhə xəttini keçən rus hərbçiləri aşkarlanaraq zərərsizləşdirilir.

Nəşrə görə, bu yazın ən mühüm dəyişikliklərindən biri Ukraynanın orta mənzilli dronlardan istifadəsini gücləndirməsi olub. "Hornet" və "FP-2" kimi aparatlarla Rusiya komanda məntəqələrinə, logistika obyektlərinə, HHM sistemlərinə və sursat anbarlarına zərbələr endirilir.

ABŞ-nin Xarici Siyasət Araşdırmaları İnstitutunun əməkdaşı Rob Li bildirir ki, Rusiya üçün uzaq məsafələrdən hücum həyata keçirmək getdikcə çətinləşir. Bununla yanaşı, Rusiyada canlı qüvvə problemi də artır. Analitik Franz-Stefan Qadi hesab edir ki, Ukrayna gözlənildiyindən daha güclü mövqedədir, amma əsas məsələ Rusiyanın bu dəyişikliklərə cavab tapa bilib-bilməyəcəyidir.

Kreml hələ də geri çəkilmək istəmir

Ekspertlərin fikrincə, yüksək müqavilə bonusları hesabına aparılan səfərbərlik Rusiya iqtisadiyyatına ciddi yük yaradır. Bununla belə, neft qiymətlərinin artması Kremlin maliyyə vəziyyətini qismən sabit saxlayır. Rusiya üzrə Karnegi Mərkəzinin direktoru Aleksandr Qabuyev hesab edir ki, daha rasional davranan Putin bu il münaqişəni dayandırmağa və ABŞ prezidenti Donald Trampdan maksimum güzəştlər almağa çalışa bilərdi. Buraya sanksiyaların ləğvi və Krımın Rusiya ərazisi kimi tanınması daxildir.

Lakin ekspertin fikrincə, problem ondadır ki, Putin hələ də Ukraynanın sonda çökəcəyinə inanır. Buna görə də yaxın vaxtlarda müharibənin dayanacağı ehtimalı zəif görünür.

Daha əvvəl alman tarixçisi Matias Ul də bildirib ki, Ukraynadakı müharibənin sürətli şəkildə başa çatacağını gözləmək düzgün deyil. Bununla belə, bəzi Qərb müşahidəçiləri hesab edir ki, ABŞ-da keçiriləcək aralıq seçkilər müharibənin taleyinə ciddi təsir göstərə bilər.