"Rusiya dronu Rumıniyada NATO-nun kritik problemini üzə çıxardı" - "Bloomberg"

"Qalats insidenti Alyansın şərq cinahında hava müdafiəsinin zəif nöqtələrini yenidən gündəmə gətirib..."

Rusiyaya məxsus zərbə dronunun Rumıniyanın Qalats şəhərində yaşayış binasına düşməsi Avropanın müasir pilotsuz uçuş aparatları qarşısında hələ də həssas olduğunu göstərib.

Moderator.az xəbər verir ki, bu barədə "bloomberg.com" nəşri yazıb.

Rumıniyadakı insident və NATO üçün xəbərdarlıq

Ukrayna sərhədindən təxminən 20 kilometr aralıda yerləşən Qalats şəhərində baş verən hadisə nəticəsində bir qadın və onun 14 yaşlı övladı yaralanıb. Rumıniya hakimiyyəti bunu Moskvanın növbəti "ciddi və məsuliyyətsiz eskalasiyası" adlandırıb. 

Nəşr qeyd edir ki, Rusiya dronlarının NATO və Aİ ölkələrinin hava məkanına daxil olması artıq nadir hadisə deyil. Rumıniya müharibə başlayandan bəri 47 belə hal qeydə alıb. Oxşar insidentlər Polşa, Finlandiya, Latviya, Litva və Estoniyada da yaşanıb. NATO-nun sabiq baş katibinin müavini Mirça Coanenin sözlərinə görə, bu hadisələr Alyansın şərq cinahında müdafiə sahəsində ciddi boşluqların qaldığını göstərir.

Köhnə sistemlər yeni təhlükələrə qarşı

Ekspertlər bildirirlər ki, müasir kamikadze dronları çox aşağı hündürlükdə uçduqları üçün ənənəvi radarlar və hava hücumundan müdafiə sistemləri onları vaxtında aşkarlaya bilmir. Rumıniya ordusunun məlumatına görə, Qalatsa düşən dron radarlar tərəfindən müəyyən edilib və havaya F-16 qırıcıları qaldırılıb.

Lakin pilotsuz aparat aşağı hündürlüyə endiyi üçün onun qarşısını almaq mümkün olmayıb. Rumıniyanın müvəqqəti baş naziri İlliye Bolojan da ölkənin müdafiə imkanlarının mövcud texniki təchizatla məhdudlaşdığını etiraf edib.

NATO zəmanətləri ilə bağlı suallar

Ekspertlərin fikrincə, problem təkcə hərbi texnologiyalarla bağlı deyil, həm də NATO-nun təhlükəsizlik zəmanətlərinə ictimai etimada təsir göstərir. Vaşinqtondakı Yaxın Şərq İnstitutunun eksperti Yuliya Coya qeyd edib ki, Rusiya dronlarının dəfələrlə Rumıniya hava məkanına daxil olması və yaşayış məntəqələrinə çatması vətəndaşlarda narahatlıq yaradır.

Bu səbəbdən Polşa, Latviya, Litva və Estoniya antidron sistemlərini sürətlə gücləndirir. Avropa Komissiyasının sədri Ursula fon der Lyayen hadisəni növbəti "qırmızı xəttin" keçilməsi kimi qiymətləndirib, Almaniya kansleri Fridrix Mers isə NATO-nun şərq cinahının daha da möhkəmləndirilməsinin vacibliyini vurğulayıb. Nəşrin qənaətinə görə, Qalats insidenti Ukraynadakı müharibənin artıq təkcə region üçün deyil, bütün Avropanın təhlükəsizlik sistemi üçün ciddi sınağa çevrildiyini bir daha nümayiş etdirib.