"Fransa dəyişir: immiqrasiya ölkənin sosial xəritəsini yenidən formalaşdırır" - "Le Figaro"

"İmmiqrasiya artıq təkcə Fransanın demoqrafiyasını deyil, onun kimlik, sosial münasibətlər və cəmiyyət modelini də dəyişdirir..."

Fransanın Milli Demoqrafik Araşdırmalar İnstitutu (INED) tərəfindən aparılan yeni araşdırma Fransada cəmiyyətin sürətlə dəyişdiyini göstərir.

Moderator.az xəbər verir ki, bu barədə Fransanın "Le Figaro" nəşri yazıb.

Fransa əhalisinin üçdə biri artıq miqrasiya mənşəlidir

Tədqiqata əsasən, Fransada yaşayanların 13 faizi birbaşa immiqrantdır, 11 faizi immiqrant ailələrinin uşaqlarıdır, 10 faizi isə ən azı bir nənə və ya babası xaricdə doğulan üçüncü nəsildir. Beləliklə, ölkə əhalisinin təxminən üçdə biri immiqrasiya ilə birbaşa bağlıdır. Əgər qarışıq ailələr və nikah əlaqələri də nəzərə alınsa, bu göstərici 41 faizə çatır.

Araşdırma göstərir ki, xüsusilə gənc nəsildə Afrika və Mağrib mənşəli ailələrin payı artır. Tədqiqat müəllifləri hesab edir ki, gələcəkdə Fransa cəmiyyətində əsas demoqrafik dəyişiklikləri məhz bu qrupların nəvələri formalaşdıracaq.

Assimilyasiya gedir, amma tam deyil

Araşdırmada qeyd olunur ki, immiqrant ailələrinin uşaqları getdikcə özlərini daha çox fransız hesab edirlər. İkinci nəsildə yalnız Fransanı öz kimliyi kimi göstərənlərin sayı artıq əhəmiyyətli dərəcədə artıb.

Bununla belə, xüsusilə Avropadan kənar mənşəli ailələrdə "ikili kimlik" hissi qorunur. Tədqiqat müəlliflərinin fikrincə, dəri rəngi, din və mənşə amili hələ də insanların gündəlik həyatında mühüm rol oynayır.

Eyni zamanda, araşdırma göstərir ki, fransız dili nəsildən-nəslə daha geniş yayılır, qadın və kişi rolları ilə bağlı ənənəvi baxışlar zəifləyir, qarışıq nikahların sayı artır. Lakin sosial inteqrasiya tam problemsiz deyil. Xüsusilə Mağrib və Afrika mənşəli insanlar arasında işsizlik səviyyəsinin daha yüksək qaldığı vurğulanır.

Təhsil artır, amma etimadsızlıq qalır

Araşdırmaya görə, Fransaya gələn immiqrantlar əvvəlki illərlə müqayisədə daha yaxşı təhsillidirlər. 2009-cu ildən sonra ölkəyə gələnlərin yarıdan çoxu ali təhsilə malik olub. İmmiqrant ailələrinin uşaqları da təhsildə ciddi nəticələr göstərirlər. Bəzi qruplarda ali təhsil alanların payı yerli fransızlardan belə yüksəkdir.

Amma buna baxmayaraq, tədqiqat müəllifləri diskriminasiya probleminin qalmaqda davam etdiyini bildirirlər. Xüsusilə polisə və dövlət institutlarına inamsızlıq Afrika və Mağrib mənşəli gənclər arasında daha yüksəkdir.

Araşdırmanın əsas nəticəsi isə budur: Fransa artıq əvvəlki kimi vahid sosial modelə malik ölkə deyil. Miqrasiya ölkənin demoqrafik, mədəni və sosial strukturunu uzunmüddətli şəkildə dəyişdirir.