"Müharibə, yoxsa sülh? - Tramp və Netanyahunun gərgin danışığının pərdəarxası" - "Vesty"

"Vaşinqton diplomatiyaya son şans verməyə çalışır, Təl-Əviv isə hesab edir ki, Tehran vaxt qazanaraq həm nüvə proqramını, həm də hərbi imkanlarını qoruyur..."

ABŞ mediası Donald Tramp ilə İsrailin baş naziri Binyamin Netanyahu arasında baş tutan "gərgin telefon danışığı"nın yeni detalları barədə məlumat yayıb.

Moderator.az xəbər verir ki, bu barədə "vesty.co" nəşri yazıb.

Vaşinqton və Təl-Əviv arasında fikir ayrılığı

Məlumata görə, söhbət Trampın "Ağır çəkic" kod adlı hərbi əməliyyatı yenidən təxirə salmaq qərarından sonra baş verib. İsrail tərəfi Vaşinqtonu inandırmağa çalışır ki, Tehran vaxt qazanır və danışıqlarla prosesi uzadır. Lakin Ağ Ev bu arqumentə tam inanmır. Mənbələrin sözlərinə görə, Netanyahu Trampa açıq şəkildə bildirib ki, gözləmə mövqeyi səhvdir və əvvəlcədən razılaşdırılmış plana uyğun hərəkət etmək lazımdır.

İsrail rəhbərliyi hesab edir ki, İran istənilən razılaşmanı pozacaq və vaxt uzandıqca vəziyyət Tehranın xeyrinə dəyişəcək. CNN və digər Amerika nəşrləri yazır ki, Netanyahu xüsusilə Trampın sərt bəyanatlar versə də, son anda hərbi əməliyyatları dayandırmasından narahatdır.

Tramp diplomatiyaya vaxt vermək istəyir

Donald Tramp isə, məlumatlara görə, hələ də diplomatik variantın tükənmədiyini düşünür. "The Wall Street Journal"ın yazdığına görə, Tramp Netanyahunun ritorikasından ciddi təsirlənməyib və İrana nüvə silahı əldə etməyə imkan verməyəcək razılaşma əldə etməyə çalışdığını bildirib. Bununla yanaşı, o, gələcəkdə hərbi əməliyyatların yenidən başlanmasını da istisna etməyib.

CNN-in məlumatına görə, Tramp əlavə bir neçə gün vaxt vermək istəyir və bunu "insan həyatlarını xilas etmək" arzusu ilə izah edir. ABŞ mediası xatırladır ki, mayın 17-də keçirilən əvvəlki danışıq zamanı Tramp zərbələrə daha yaxın mövqedə idi, lakin son anda əməliyyatı dayandırıb.

"The Wall Street Journal" yazır ki, Ağ Evdə keçirilən müşavirədə administrasiya İrana qarşı iqtisadi təzyiqlərin nəticə verdiyi qənaətinə gəlib. Bununla belə, əgər müharibə yenidən başlasa, Tramp əsasən İranın enerji infrastrukturu və strateji obyektlərinə zərbələr endirməyi planlaşdırır.

Tehran, Pakistanın vasitəçiliyi və Hörmüz boğazı

Bu arada İran ABŞ-dan yeni təklif aldığını və onu araşdırdığını açıqlayıb. İran Xarici İşlər Nazirliyinin nümayəndəsi İsmayıl Bəqayi bildirib ki, Pakistan Tehran və Vaşinqton arasında vasitəçilik rolunu davam etdirir. İran parlamentinin milli təhlükəsizlik komitəsinin nümayəndəsi Fəda Hüseyn Maleki isə Pakistan Baş Qərargah rəisi Asim Munirin Tehrana "xüsusi mesaj"la gələcəyini deyib.

Buna baxmayaraq, tərəflərin mövqeləri hələ də bir-birindən uzaq qalır. İran nə nüvə proqramı, nə də Hörmüz boğazı məsələsində geri addım atmağa hazır görünür. ABŞ isə sanksiyaların yumşaldılması ilə bağlı ciddi güzəştlərə getmək istəmir.

Trampın zərbələri təxirə salması isə Səudiyyə Ərəbistanı tərəfindən müsbət qarşılanıb. Krallığın xarici işlər naziri Feysəl bin Fərhan faktiki olaraq Körfəz ölkələrinin müharibənin yenidən başlamasına qarşı çıxdığını təsdiqləyib. Onun sözlərinə görə, Ər-Riyad Vaşinqtonun danışıqlara əlavə şans verməsini yüksək qiymətləndirir və İranın bu imkandan istifadə edəcəyinə ümid edir.