"Vindzor Kral Atçılıq Şousu"nda III Çarlza Azərbaycanın milli hədiyyələri təqdim edilib - VİDEO

Böyük Britaniya və Şimali İrlandiya Birləşmiş Krallığının Kral Ailəsinin üzvlərinin şərəfinə ənənəvi olaraq hər il təşkil edilən "Vindzor Kral Atçılıq Şousu" uğurla başa çatıb.

Moderator.az xəbər verir ki, bu barədə Dövlət Sərhəd Xidməti (DSX) məlumat yayıb.

Bildirilib ki, Azərbaycan Prezidenti İlham Əliyevin diqqəti və Birinci vitse-prezident Mehriban Əliyevanın rəhbərlik etdiyi Heydər Əliyev Fondunun dəstəyi ilə milli sərvətimiz olan Qarabağ atlarının qorunması və dünya miqyasında tanınması istiqamətində mühüm işlər görülüb, əhəmiyyətli addımlar atılıb.

Görülmüş məqsədyönlü tədbirlərdən biri də qədim və unikal mədəniyyətimizin təbliği üçün olduqca əhəmiyyətli platformaya çevrilən və 2012-ci ildən etibarən ölkəmizin dəvət aldığı "Vindzor Kral Atçılıq Şousu"nda Azərbaycanın layiqincə tanıdılmasıdır.

Hər il geniştərkibli nümayəndə heyətinin təqdim etdiyi bənzərsiz şou-proqramlar və performanslar "Vindzor Kral Atçılıq Şousu"nun əvəzolunmaz tərkib hissəsinə çevrilib.

Heydər Əliyev Fondunun dəstəyi, Azərbaycan Atçılıq Federasiyasının təşkilatçılığı ilə Dövlət Sərhəd Xidmətinin süvarilər dəstəsi və rəqs ansamblı ölkəmizi "Vindzor Kral Atçılıq Şousu"nda növbəti dəfə uğurla təmsil edib, göstərdikləri performansları, qədim tariximizi və milli geyimlərimizi əks etdirən çıxışları ilə tamaşaçıların diqqətini cəlb etməyi bacarıb, onların marağına səbəb olublar.

Tədbir zamanı milli musiqi alətlərimizdə səslənən musiqilər, "Sərhədçi" rəqs ansamblının enerji dolu rəqsləri və Dövlət Sərhəd Xidmətinin süvarilər dəstəsinin Qarabağ atları üzərində nümayiş etdirdiyi igidlik və cəsarət nümunələri Böyük Britaniya tamaşaçısının rəğbətini qazanıb.

Tədbirin ilk günündən ardıcıl olaraq 20 dəqiqə davam edən şou müddətində süvarilərimiz yüksək peşəkarlığı və dəqiqliyi ilə seçiliblər.

"Vindzor Kral Atçılıq Şousu"nda ölkəmizin zəngin mədəniyyətini əks etdirən sənət nümunələri təqdim edilib, Heydər Əliyev Fondunun təşkil etdiyi və maraqla qarşılanan Azərbaycan pavilyonu barədə qonaqlara ətraflı məlumat verilib.

Tədbir çərçivəsində Azərbaycan nümayəndə heyəti tərəfindən Böyük Britaniya Kralı III Çarlza Azərbaycan xalqının milli-mənəvi dəyərlərinin, zəngin mədəni irsinin və əsrlər boyu formalaşmış yüksək sənət ənənələrinin ifadəsi kimi Şirvan xalçası və Faik Hacıyevin əsəri olan "Dilbaz atı üzərində Azərbaycan döyüşçüsü" heykəli hədiyyə edilib.

Tədbirin yekununda "Land of Fire - Azerbaijan" polo komandasının Böyük Britaniyanın Vindzor şəhərini təmsil edən "Guards" polo komandası ilə dostluq görüşü keçirilib və görüş təmsilçimizin 7-5 hesablı qələbəsi ilə başa çatıb.