ABŞ Ukraynaya "Hawk" hava hücumundan müdafiə sistemi üçün yeni paket ayırdı - Dövlət Departamenti

Bizi sosial şəbəkələrdən izləyin:

Vaşinqton 108 milyon dollarlıq texniki dəstək və avadanlıq satışını təsdiqləyib...

ABŞ Dövlət Departamenti Ukraynaya "Hawk" hava hücumundan müdafiə sistemi üçün avadanlıq və texniki xidmət satışını təsdiqləyib.

Moderator.az xəbər verir ki, bu barədə "glavred.info" nəşri məlumat yayıb.

Paketə texniki xidmət və ehtiyat hissələri daxildir

Məlumatda deyilir ki, paketin ümumi dəyərinin 108,1 milyon dollar olduğu bildirilir. Söhbət birbaşa yeni zenit-raket komplekslərinin verilməsindən deyil, mövcud sistemlərin işlək vəziyyətdə saxlanılması üçün genişmiqyaslı dəstək paketindən gedir.

Buraya ehtiyat hissələri, təmir, logistika və mühəndis-texniki xidmət daxildir. ABŞ Dövlət Departamenti bəyan edib ki, bu qərar Vaşinqtonun xarici siyasət və milli təhlükəsizlik məqsədlərinə uyğundur. Qurumun açıqlamasında Ukraynanın Avropada siyasi və iqtisadi sabitlik üçün vacib tərəfdaş olduğu vurğulanıb.

Ukraynanın HHM imkanları gücləndiriləcək

Vaşinqton hesab edir ki, yeni paket Ukraynanın mövcud və gələcək hava təhdidlərinə qarşı müdafiə imkanlarını artıracaq. Xüsusilə inteqrasiya olunmuş hava hücumundan müdafiə sisteminin daha effektiv işləməsinə şərait yaradılacağı qeyd olunur.

Layihənin əsas podratçısı kimi "Sierra Nevada Corporation" seçilib. Şirkət Kolorado ştatında yerləşir. Tədarüklərin dəqiq vaxtı isə açıqlanmayıb. ABŞ tərəfi əlavə edib ki, bu satış Amerika ordusunun döyüş hazırlığına və müdafiə qabiliyyətinə təsir göstərməyəcək.

"Hawk" sistemi nədir?

"MIM-23 Hawk" Amerikanın orta mənzilli zenit-raket kompleksidir. Sistem ilk olaraq təyyarələrin məhv edilməsi üçün hazırlanıb, daha sonra isə raketlərin havada tutulması imkanları ilə modernləşdirilib. Kompleks ABŞ ordusunda 1960-cı ildən istifadə olunur və bu müddətdə bir neçə dəfə yenilənib. Qərb analitiklərinin qiymətləndirməsinə görə, "Hawk" sistemi hava hədəflərini təxminən 85 faiz ehtimalla vurmaq qabiliyyətinə malikdir.

Silah tədarükləri davam edir

Məlumata görə, Ukrayna ABŞ silahlarını NATO-nun PURL proqramı çərçivəsində almağa davam edir. Bu mexanizm vasitəsilə Avropa ölkələri Kiyev üçün Amerika istehsalı olan silahların alınmasını maliyyələşdirir. Bəzi Qərb nəşrləri Yaxın Şərqdəki vəziyyət səbəbindən müəyyən silah tədarüklərinin gecikə biləcəyini yazsa da, Ukrayna Prezidenti Ofisi proqramın fəaliyyətini davam etdirdiyini açıqlayıb.