"Sevgi sığalı" və Hörmüz gərginliyi: ABŞ-İran qarşıdurması yenidən alovlanır - İsrail mətbuatı

Bizi sosial şəbəkələrdən izləyin:

Hörmüzdə toqquşma, neftin bahalaşması və MKİ xəbərdarlığı fonunda gərginlik artır...

ABŞ və İran arasında onsuz da gərgin olan münasibətlər yeni hərbi insidentlə daha da kəskinləşib.

Moderator.az xəbər verir ki, bu barədə "israelinfo.co" nəşri yazıb.

Hörmüz boğazında yeni toqquşma dalğası

Məlumata görə, Hörmüz boğazından keçən üç ABŞ esminesi - USS Truxton, USS Rafael Peralta və USS Mason İran qüvvələrinin hücumuna məruz qalıb. Hücum zamanı raketlər, PUA-lar və sürətli katerlərdən istifadə edilib.

Vaşinqton cavab olaraq İran ərazisində raket və PUA bazalarına, komanda mərkəzlərinə və kəşfiyyat obyektlərinə zərbələr endirib. ABŞ tərəfi insidentləri "aşağı səviyyəli təxribatlar" kimi qiymətləndirir və atəşkəsin pozulmadığını bildirir.

İran isə ABŞ-ı gərginliyi artırmaqda günahlandırır, Kəşm adasında və mülki obyektlərdə ziyan yarandığını iddia edir. Tehran "cavab əməliyyatı" keçirdiyini açıqlasa da, Vaşinqton bunu təkzib edir. Gərginlik fonunda BƏƏ-də hava hücumundan müdafiə sistemləri işə salınıb, raket və dronlar zərərsizləşdirilib.

ABŞ prezidenti Donald Tramp insidenti şərh edərək vəziyyətin nəzarətdə olduğunu bildirib və Hörmüzdən keçən gəmilərin zərər görmədiyini vurğulayıb. O, əvvəlki hücumları isə "sevgi sığalı" adlandırıb.

Diplomatik danışıqlar davam edir, amma neft bahalaşır

ABŞ və İran arasında dolayı diplomatik kanallar hələ də açıqdır. Vasitəçi rolunu Pakistanın oynadığı bildirilir. Tərəflər Hörmüz boğazında təhlükəsiz dəniz hərəkətini müzakirə edir.

Bununla belə, gərginlik bazarlara dərhal təsir edib - neftin bir bareli 100 dolları keçib, ABŞ-da yanacaq qiymətləri kəskin artıb. Hazırda yüzlərlə gəmi təhlükəsiz keçid üçün gözləmə mövqeyindədir.

"İran düşündüyündən daha dayanıqlıdır"

ABŞ Mərkəzi Kəşfiyyat İdarəsinin məxfi hesabatı Ağ Evin nikbin bəyanatları ilə ziddiyyət təşkil edir. Sənədə görə, İran tam dəniz blokadası şəraitində belə 3-4 ay dayana bilər. Hesabatda mobil raket sistemlərinin 75 faizinin işlək olduğu, arsenalın 70 faizə qədərinin qorunduğu bildirilir.

Yeraltı obyektlərin bərpa edildiyi və yeni raket istehsalının davam etdiyi qeyd olunur. Bununla belə, ABŞ administrasiyası İranın ciddi zəiflədiyini iddia edir və dəniz blokadasını "sarsılmaz divar" kimi təqdim edir. Kəşfiyyat icmasının bir hissəsi isə Tehranın uzunmüddətli müqavimətə hazır olduğunu düşünür.