"Ermənistanda seçki öncəsi casusluq və xəyanət qalmaqalı" - "Deutsche Welle"

"Nikol Paşinyanla Rusiya yönümlü müxalifət arasında qarşıdurma kəskinləşir, Moskva isə İrəvana həm siyasi, həm iqtisadi təzyiqi artırır..."

Ermənistanda 7 iyun parlament seçkiləri öncəsi siyasi qarşıdurma kəskin mərhələyə keçib. Baş nazir Nikol Paşinyan və Rusiya yönümlü müxalifət bir-birini dövlətə xəyanətdə ittiham edir.

Moderator.az xəbər verir ki, bu barədə "dw.com" nəşri yazıb.

Ermənistanda seçkiqabağı vəziyyət gərginləşir

Məlumatda deyilir ki, qalmaqal Paşinyanın Vanadzorda keçirdiyi mitinqdən sonra daha da böyüyüb. O bildirib ki, Ermənistan Milli Təhlükəsizlik Xidməti müxalif siyasətçi Andranik Tevanyan barədə "dövlətə xəyanət" maddəsi ilə cinayət işi açılması üçün materiallar təqdim edəcək.

İstintaq iddia edir ki, Tevanyan xarici xüsusi xidmət orqanları ilə əməkdaşlıq edib və parlamentin qapalı iclası ilə bağlı məxfi məlumatları rus dilində ötürüb. Müxalif siyasətçi isə ittihamları rədd edərək bunu "siyasi sifariş" adlandırıb və Paşinyanı Azərbaycanın maraqlarına xidmət etməkdə günahlandırıb.

"FTX pasportu" qalmaqalı və müxalifətə təzyiq

Gərginlik "The Insider"in araşdırmasından sonra daha da artıb. Nəşr bəzi erməni siyasətçilərinin Rusiya xüsusi xidmət orqanları ilə mümkün əlaqələri barədə məlumat yayıb. Araşdırmada "Güclü Ermənistan" partiyasının lideri Samvel Karapetyanın sənədlərində iş yeri kimi FTX İnformasiya Mərkəzinin göstərildiyi iddia olunur. Eyni materialda digər iri müxalif fiqur, biznesmen Qaqik Tsarukyanın da adı keçir.

Bundan sonra Paşinyan hökuməti Tsarukyana məxsus "Araratsement" zavodunun milliləşdiriləcəyini açıqlayıb. Paralel olaraq "Güclü Ermənistan" partiyasının nümayəndələri barədə seçicilərin pulla ələ alınması ittihamı ilə cinayət işləri açılıb. Moskva isə bütün ittihamları "saxta kampaniya" adlandıraraq bunu Rusiyanı Cənubi Qafqazdan sıxışdırmaq cəhdi kimi qiymətləndirib.

İrəvan Qərbə yaxınlaşır, Moskva təzyiqi artırır

Ermənistandakı siyasi böhran ölkənin xarici siyasət kursunun dəyişməsi fonunda baş verir. İrəvan son aylarda Avropa İttifaqı ilə yaxınlaşmanı sürətləndirib və artıq Avropa İttifaqına inteqrasiya prosesinə start verilməsi barədə qanun qəbul olunub. Rusiya yönümlü müxalifət isə Moskva ilə strateji tərəfdaşlığın bərpasını tələb edir və Rusiyanı Azərbaycanın qarşısında əsas təhlükəsizlik təminatçısı hesab edir.

Kreml isə İrəvana açıq mesajlar göndərir. Rusiya Təhlükəsizlik Şurasının katibi Sergey Şoyqu bildirib ki, Moskva Ermənistana qazı, yanacağı və digər məhsulları bazar qiymətindən xeyli ucuz satır. O həmçinin xatırladıb ki, Ermənistan kənd təsərrüfatı məhsullarının böyük hissəsini məhz Rusiya bazarına ixrac edir.

Bundan dərhal sonra Rusiya Ermənistandan çiçək idxalına qadağa qoyub və meyvə-tərəvəzlə bağlı da problemlər aşkarlandığını açıqlayıb. Ekspertlər bunu İrəvana iqtisadi təzyiq vasitəsi kimi qiymətləndirir.

Müxalifət seçkilərdən kənarlaşdırılacaq?

Müşahidəçilərin əsas sualı budur: Paşinyanın əsas rəqibləri seçkilərə buraxılacaqmı? Ekspertlər hesab edir ki, müxalifətin tam şəkildə seçkidən uzaqlaşdırılması ehtimalı böyük deyil. Lakin casusluq, korrupsiya və xarici əlaqələr ətrafında gündəlik qalmaqalların yaradılması hakimiyyətə informasiya üstünlüyü qazandırır.

Siyasi analitiklər bildirirlər ki, Paşinyan komandası cəmiyyətdəki parçalanmadan siyasi texnologiya kimi istifadə edir. Çünki yüksək siyasi qütbləşmə şəraitində hakim partiyanın elektoratı daha yaxşı səfərbər olur. Son sorğulara görə, Paşinyanın "Vətəndaş müqaviləsi" partiyası hələ də əsas rəqiblərini xeyli qabaqlayır. Lakin seçkilərin nəticəsinə qərarsız və heç bir siyasətçiyə inanmayan seçicilər ciddi təsir göstərə bilər.