Gürcüstanda qəzada ölən yeddi azərbaycanlı kim idi? - FOTO

Bu səhər Gürcüstanın Qardabani bölgəsində baş verən və azərbaycanlıların həlak olduğu dəhşətli qəza və ölənlərlə bağlı bəzi detallar məlum olub.

Bu barədə Moderator.az Marneuli.news-a istinadən xəbər verir.

Qardabani bölgəsinin Birlik kəndində yüksək sürətlə hərəkət edən BMW avtomobili ağaca çırpılıb və parçalara bölünüb.

Gürcüstan Daxili İşlər Nazirliyinin (DİN) məlumatına görə, hadisə ilə bağlı Cinayət Məcəlləsinin 276-cı maddəsinin 8-ci hissəsi üzrə araşdırma başlanıb ki, bu maddə iki və ya daha çox insanın ölümünə səbəb olan yol hərəkəti qaydalarının pozulması ilə bağlıdır.

Nazirliyin rəsmi məlumatına görə, yeddi nəfər həlak olub, bir gənc isə ağır vəziyyətdə xəstəxanaya aparılıb və hazırda onun həyatının xilas edilməsi uğrunda həkimlər səy göstərirlər.

Yerli sakinlərin sözlərinə görə, gənclər bir yerdə işləyiblər və həmin səhər birlikdə işə gedirmişlər ki, bu dəhşətli faciə baş verib. Ölənlər bir-biri ilə qohumdurlar.

Görüntülərə görə, onlar çox yüksək sürətlə hərəkət ediblər, sürücü idarəetməni itirib və qəza baş verib.

"Birlik kəndimizdən dörd gənc həlak oldu. İki qardaş və iki qohum. Təəssüf ki, iki ailədən dörd gənc öldü. Onlar qonşuluqda yaşayırdılar. Bildiyim qədəri ilə maşında Saqarexodan daha üç gənc olub. Saqarexo sakinləri də həlak olublar. Bu səhər dedilər ki, toqquşma bir neçə sərnişini maşından kənara atıb. İki nəfər maşında ilişib qalıb. İki nəfər sağ halda xəstəxanaya aparılıb, amma sonra eşitdim ki, ölənlərin sayı artıb. Deyəsən, biri də xəstəxanada ölüb. Mən heç vaxt belə qəza görməmişdim, hər şey parçalara bölünmüşdü. Mən elə bilirdim ki, onlar yeddi nəfər olublar, sonra eşitdim ki, səkkizincisi də olub. Dəhşətli hadisə kəndə yayılır. Orada olan hər kəs şokdadır, maşının hissələri hər yerə səpələnib. Bildiyim qədəri ilə, maşının bir hissəsi alovlanıb. Maşın tamamilə məhv olub, orada sağ qalmaq şansı yox idi. Onların hansı sürətlə getdiklərini bilmirəm. Ölənlərdən birini uzaqdan tanıyırdım... O, restoranda ofisiant işləyirdi, çox yaxşı oğlan idi. Onun qardaşı da ölüb. Hamıya başsağlığı verirəm. Bu, böyük bir faciədir, çox çətin bir vəziyyətdir", - deyə yerli sakin hadisə barədə danışıb.

Yazıda bildirildiyinə görə, Birlik kəndində yaşayan həlak olmuş qardaşların kimliyi müəyyənləşdirilir. Ölənlər Şamil və Kamil Əliyevlər, eləcə də digər iki qardaş - Əlil və Sahir Cəlilovlardır.

"Kamilinin 19, Şamilin 17 yaşı var idi. Oğlanların valideynləri vəfat ediblər. Onlar nənə və babalarının himayəsində böyüyürdülər. Valideynləri çoxdan vəfat ediblər, əvvəlcə ataları, sonra isə anaları. Hər ikisi nəzakətli, səliqəli və mədəni davranışları ilə fərqlənirdilər və heç kimə mane olmurdular. Hamı qardaşları çox sevirdi. Şamil çox mehriban idi. Hamı ona heyran idi. Ürəyim çox ağrıyır. Şamil ofisiant işləyirdi, çox çalışırdı, Kamil idmanla, boksla məşğul olurdu. Mən bu hadisədən çox təsirlənmişəm, onların necə gözəl qardaşlar olduqlarını təsvir etmək üçün söz tapmaq mümkün deyil. Hər kəsə başsağlığı verirəm", - deyə oğlanların təhsil aldıqları məktəbin müəllimi danışıb.

Hadisə ilə bağlı araşdırma başlanıb. Faciə yerində araşdırmalar davam edir.

Cəsədlər üzərində autopsiya aparılacaq. Zərərçəkənlərdən biri hazırda Rustavidəki klinikadadır və həkimlər onun vəziyyətinin kritik olduğunu bildirirlər.