Birinin sizə uyğun olmadığını necə bilmək olar? - Görüşdə 5 təhlükə

Bizi sosial şəbəkələrdən izləyin:

Tanınmış psixoloq Sabrina Romanoff yeni münasibət qurarkən diqqət yetirilməli olan əsas xəbərdaredici siqnalları açıqlayıb.

Moderatora.z Lent.az-a istinadla xəbər verir ki, psixoloqun sözlərinə görə, uğurlu münasibətin əsas göstəricisi davamlılıqdır.

Yəni ilk vaxtlarda ideal görünən davranışlar hər kəs tərəfindən nümayiş etdirilə bilər, lakin həqiqətən uyğun olan insan zaman keçdikcə də eyni diqqət və marağı qoruyub saxlayır.

Mütəxəssis bildirir ki, bəzi davranışlar var ki, onları görməzdən gəlmək olmaz. Məsələn, münasibətin əvvəlində çox diqqət göstərən, lakin sonradan birdən-birə çox məşğul olduğunu deyərək uzaqlaşan insan ciddi siqnal verir. Bu, adətən sizin həmin insan üçün prioritet olmadığınızı göstərir.

Digər vacib məqam isə insanın keçmiş münasibətləri haqqında necə danışmasıdır. Əgər o, bütün keçmiş partnyorlarını yalnız mənfi sözlərlə xatırlayır və məsuliyyəti daim qarşı tərəfin üzərinə atırsa, bu, onun öz səhvlərini qəbul etmədiyini göstərir. Sağlam yanaşma isə insanın keçmişdə öz rolunu da etiraf etməsidir.

Psixoloq həmçinin ilk görüşdə verilən böyük və sürətli vədlərin də şübhəli olduğunu vurğulayır. Tanışlığın ilk mərhələsində birlikdə gələcək planlar qurmaq, səyahət, ortaq həyat kimi mövzuları qabartmaq süni yaxınlıq yaratmaq cəhdi ola bilər. Özünə güvənən və emosional cəhətdən sabit insan bu cür tələsməz.

Bundan əlavə, kobud davranışın “mən sadəcə dürüstəm” kimi ifadələrlə ört-basdır edilməsi də təhlükəli siqnaldır. Belə insanlar qarşı tərəfin hisslərini nəzərə almır və münasibətdə hörmət balansını poza bilər. Sağlam münasibətdə insan özünü təhlükəsiz və dəyərli hiss etməlidir.

Nəhayət, münasibətdə daim diqqət uğrunda mübarizə aparmaq da ciddi xəbərdarlıqdır. Əgər qarşı tərəf canlı ünsiyyətdən qaçır, əsasən mesajlaşma ilə kifayətlənir və siz onun diqqətini qazanmaq üçün davamlı səy göstərirsinizsə, bu vəziyyət uzun müddətdə emosional yorğunluğa səbəb ola bilər.

Psixoloqlar qeyd edir ki, münasibət seçərkən ən vacib məqam hissləri deyil, davranışların ardıcıllığını və real münasibəti qiymətləndirməkdir. Bu isə gələcəkdə daha sağlam və balanslı əlaqə qurmağa kömək edir.