Fərdi həkim kimi işləmək istəyənlər üçün TƏLƏBLƏR

“Lisenziya özəl tibb fəaliyyəti ilə məşğul olan sahibkarlıq subyektlərinə verilir”.

Moderator.az xəbər verir ki, bu fikirləri “Sağlam radio”nun (93 FM) “Sağlam səhər” efirində Səhiyyə Nazirliyi Analitik Ekspertiza Mərkəzinin Tibbi nəzarət şöbəsinin baş mütəxəssisi Xəyalə Əliyeva açıqlayıb.

Onun sözlərinə görə, özəl tibb fəaliyyəti ilə məşğul olan sahibkarlıq subyektləri hüquqi şəxs yaratmadan, yəni müəyyən cəmiyyət (MMC, QSC, MMM və s.) yaratmadan fərdi qaydada fəaliyyət göstərmək istədiyi halda özünün həm də həkim olması şərtdir:

“Yəni, həm sahibkarlıq subyekti olaraq lisenziya almalıdır, həm də həkim kimi sertifikasiya şəhadətnaməsi zəruridir. Fərdi sahibkar olmaqla həm vergi ödəyicisidir, əldə etdiyi gəlirlərdən vergi ödəyir, həm də lisenziya almaqla sanitariya-gigiyenik, eyni zamanda da epidemioloji tələblərə riayət etməklə əhaliyə yüksək və keyfiyyətli xidmət göstərmiş olur. O ki, qaldı sertifikasiya şəhadətnaməsinə, bu isə həkimlərin hər beş ildən bir nəzəri biliklərinin praktikada tətbiqi üçün qanunvericilikdə nəzərdə tutulmuş qaydada tədrisə cəlb olunması deməkdir. Belə olan halda texniki tərəfdən əlavə həkimlər bilik və bacarıqlarından irəli gələrək daha təcrübəli və savadlı formada xidmət göstərmiş olur. Sertifikasiya şəhadətnaməsi olmadan praktik tibb fəaliyyəti, eləcə də lisenziya olmadan özəl tibb fəaliyyəti üzrə sahibkarlıq yolverilməzdir”.