İT-də komfort dövrü bitir: mütəxəssisləri ağır illər gözləyir - "Forbes"

Bizi sosial şəbəkələrdən izləyin:

Artıq bazar işçi deyil, işəgötürən tərəfdədir...

2026-cı ildə iqtisadi geriləmə əmək bazarını köklü şəkildə dəyişib. Bir neçə il əvvəl İnformasiya Texnologiyaları (İT) sahəsində mütəxəssislər şirkətləri seçirdisə, indi vəziyyət tam əksinə çevrilib - işəgötürənlər seçim edir, namizədlər isə daha uzun müddət gözləməli olur.

Moderator.az xəbər verir ki, bu barədə "forbes.com" nəşri yazıb.

Vakansiyalar azalır, rəqabət artır

"CorpSoft24" şirkətinin rəhbəri Konstantin Renzyayevin sözlərinə görə, "ağ yaxalı" peşələr, xüsusilə İT sektoru əvvəlki üstün mövqeyini tədricən itirir. Statistikalar göstərir ki, vakansiyaların sayı azalır, iş axtaranların sayı isə sürətlə artır. Nəticədə bir iş yerinə 10-dan çox namizəd düşür. Bir neçə il əvvəl "kompaniya səni cəlb etmək üçün yarışırdı" prinsipi indi tam əksinə çevrilib.

İT bazarında ən böyük dəyişiklik təkcə rəqəmlərdə deyil, yanaşmadadır. Artıq yüksək maaş, rahat ofis və əlavə imtiyazlar ("komfort dövrü") əvvəlki kimi həlledici amil deyil. Şirkətlər xərcləri azaldır, seçimlərini sərtləşdirir və süni intellekt vasitəsilə bir çox prosesi avtomatlaşdırır.

Süni intellekt və sərtləşən bazar

İri texnoloji şirkətlərin minlərlə əməkdaşı ixtisar etməsi bu meyli daha da gücləndirib. Xüsusilə təcrübəsiz və orta səviyyəli mütəxəssislər üçün bazar daha çətinləşib. Təcrübəli kadrlar hələlik daha stabil görünür, amma ümumi meyl maaşların da gələcəkdə təzyiq altında qalacağını göstərir.

Eyni zamanda şirkətlər artıq riskləri azaltmaq üçün yeni modelə keçirlər: əvvəlcə qısamüddətli əmək müqaviləsi, yalnız sonra daimi iş. Bu yanaşma həm biznes üçün çeviklik yaradır, həm də işə qəbul prosesini daha sərt edir.

Az gözlənti, daha sərt seçim

Mütəxəssislərin fikrincə, əmək bazarında əsas problem gözləntilərlə reallıq arasındakı uçurumdur. Bir çox namizəd hələ də əvvəlki illərin yüksək maaş standartlarını gözləyir, lakin real təkliflər xeyli aşağıdır. İşəgötürənlər isə geniş seçim imkanı səbəbindən daha ehtiyatlı davranır.

Renzyayev hesab edir ki, bu, qısamüddətli böhran deyil, uzunmüddətli struktur dəyişiklikdir. İT sektoru yox olmur, amma əvvəlki "asan qazanc" dövrü artıq bitir: "Bu sahədə yerini qoruyacaq insanlar daha çox işləməyə və yenidən öyrənməyə hazır olanlardır. Digərləri üçün isə bazar getdikcə daralacaq", - deyə o bildirib.