"Tramp Pekinə səfərinə peşman oldu: qaçılmaz son daha da yaxınlaşdı" - "Asharq Al-Awsat" (Səudiyyə Ərəbistanı)

"Trampın Pekinə səfəri ABŞ hegemonluğunun zəifləməsini dayandıra bilmədi və dünya sürətlə çoxqütblü nizama doğru gedir..."

Donald Tramp və Vladimir Putinin Pekinə səfərləri ABŞ-ın qlobal hegemonluğunu qorumaqda çətinlik çəkdiyini göstərir.

Moderator.az xəbər verir ki, bu barədə Səudiyyə Ərəbistanının "Asharq Al-Awsat" nəşri yazıb.

Pekin Vaşinqtona meydan oxuyur

Məqalədə bildirilir ki, Trampın Çin səfəri Vaşinqtonun əvvəlki gücünü qorumaqda aciz qaldığını göstərib. Nəşrin fikrincə, Pekinin qısa müddətdə həm Trampı, həm də Putini qəbul etməsi Çinin beynəlxalq arenada artan rolunun göstəricisidir.

Qeyd olunur ki, Çin birbaşa müharibələrə qoşulmadan "balanslaşdırılmış xarici siyasət" yürüdür və bunun sayəsində həm siyasi-iqtisadi əlaqələrini genişləndirib, həm də əsas ticarət tərəfdaşlarından birinə çevrilib.

Çin və Rusiya yeni dünya nizamından danışır

Nəşr yazır ki, Çin ABŞ-dan geri qalsa da, çoxqütblü dünya modelini fəal şəkildə təşviq edir. Si Tszinpin və Vladimir Putin Pekində dövlətlərin maraqlarına hörmət edən yeni dünya düzəninin vacibliyini vurğulayıblar. Putin bildirib ki, yeni beynəlxalq sistem maraqlar balansına, mədəni müxtəlifliyə hörmətə və BMT, BRİKS kimi platformalarda əməkdaşlığa əsaslanmalıdır.

Məqalədə qeyd olunur ki, Si Tszinpin daha əvvəl də hegemonluq siyasətinin dünyanı "cəngəllik qanunları"na qaytara biləcəyi barədə xəbərdarlıq etmişdi. Müəlliflərin fikrincə, Vaşinqtonun neokolonial siyasəti qlobal sabitliyi sarsıdır.

Dollar asılılığını azaltmaq planı

Sammit zamanı Çin və Rusiya ikitərəfli münasibətlərin genişləndirilməsi və "çoxqütblü dünya" ilə bağlı iki mühüm sənəd imzalayıb. Məqalədə bildirilir ki, Moskva və Pekin milli valyutalardan daha geniş istifadə etməyə və dollardan asılılığı azaltmağa çalışır. Hazırda iki ölkə arasındakı ticarət dövriyyəsinin təxminən 240 milyard dollar olduğu qeyd edilir.

ABŞ hegemonluğu zəifləyir, dünya dəyişir

Nəşr yazır ki, Trampın Pekinə səfəri ABŞ-ın qlobal təsir imkanlarının zəiflədiyi dövrə təsadüf edir. "Amerika hər şeydən öncədir" siyasəti Vaşinqtonun həm rəqibləri, həm də Avropa müttəfiqləri ilə münasibətlərini gərginləşdirib. Məqalənin sonunda vurğulanır ki, dünya sürətlə çoxqütblü sistemə doğru hərəkət edir və ABŞ artıq bu prosesi dayandırmaq iqtidarında deyil.