"Paşinyanın Rusiya ilə "sivil boşanması"? Moskvanın Ermənistandakı təsiri zəifləyir" - "Deutsche Welle"

"İrəvan seçkilər öncəsi Avropa ilə yaxınlaşmanı sürətləndirir, Kreml isə Paşinyana qarşı informasiya kampaniyaları ilə mövqelərini qorumağa çalışır..."

İrəvandan Ağrı dağı aydın görünür. Axşam saatlarında onun yamaclarında işıqlar yanıb-sönür - bu, Türkiyə ordusunun elektron kəşfiyyat bazasıdır. Ermənistanda akkreditə olunmuş NATO ölkələrindən birinin səfiri bunu zarafatla belə şərh edib: "Müttəfiqlər həmişə göz önündədir".

Moderator.az xəbər verir ki, bu barədə "dw.com" nəşri yazıb.

Ermənistan NATO-ya yox, "neytrallığa" yaxınlaşır

Ermənistan iyunun 7-də keçiriləcək parlament seçkilərinə hazırlaşır. Müşahidəçilərin fikrincə, bu seçkilər ölkənin xarici siyasət kursunu uzun illər üçün müəyyən edə bilər. Baş nazir Nikol Paşinyan və onun "Vətəndaş Müqaviləsi" partiyası seçkiyə Qərblə, xüsusilə Avropa İttifaqı ilə yaxınlaşma şüarları ilə gedir.

Parlament sədri Alen Simonyan bildirib ki, Ermənistan hərbi bloklarda yer almaqdansa "neytral" qalmalıdır. Formal olaraq ölkə hələ də Rusiyanın rəhbərlik etdiyi KTMT-nin üzvüdür. Lakin İrəvan 2020 və 2023-cü illərdə Azərbaycanla qarşıdurmalarda Moskvanın dəstək vermədiyini əsas gətirərək təşkilatdakı fəaliyyətini dondurub.

Bu səbəbdən "neytrallıq" əslində Rusiyadan uzaqlaşmaq və gələcəkdə KTMT-dən çıxmaq anlamına gəlir. Bununla belə, Ermənistanın yaxın vaxtlarda NATO-ya üzv olması real görünmür.

Rusiyadan uzaqlaşma sürətlənir

"Gallup"un 2024-cü il sorğusuna görə, respondentlərin 57 faizi Avropa İttifaqına üzvlüyü dəstəkləyir, 29 faizə yaxın insan isə NATO ilə yaxınlaşmanın tərəfdarıdır. Bu, Ermənistan üçün ciddi siyasi dönüş sayılır.

İrəvanın Qərblə müdafiə əməkdaşlığı da genişlənir. Avropa İttifaqı Ermənistan ordusuna 30 milyon avro yardım ayırıb, Fransa və Hindistanla isə 1 milyard avrodan çox silah müqavilələri imzalanıb. Rus silahları isə mərhələli şəkildə ordudan çıxarılır.

Kreml təzyiq göstərir

Buna baxmayaraq, Rusiyanın Ermənistandakı mövqeləri hələ də güclüdür. Gümrüdə Rusiya bazası fəaliyyət göstərir, "Qazprom" Ermənistana güzəştli qaz satır, Rusiya telekanalları ölkədə geniş yayımlanır.

May ayında Moskva Ermənistan konyakı və "Cermuk" mineral suyunun idxalını dayandırıb. İrəvan bunu siyasi xəbərdarlıq kimi qiymətləndirib.
Ekspertlərin fikrincə, Kreml Ermənistana iqtisadi təzyiqi artırsa, bu addımlar Paşinyandan çox Rusiyanın öz mövqelərinə zərbə vuracaq.

Moskvanın "yumşaq gücü" zəifləyir

Seçkilər öncəsi Rusiya sosial şəbəkələrdə Paşinyana qarşı informasiya kampaniyalarını gücləndirib. Lakin yerli ekspertlər hesab edir ki, bu kampaniyalar erməni cəmiyyətində ciddi təsir yaratmır. "CivilNet"in nümayəndəsi Ani Qriqoryanın sözlərinə görə, Rusiyanın hazırladığı kontentin böyük hissəsi auditoriyanı maraqlandırmır.

Hətta Paşinyan və Fransa prezidenti Emmanuel Makron barədə süni intellektlə hazırlanmış saxta videolar da ciddi rezonans doğurmayıb.
Diplomatların qənaətinə görə, Rusiyanın hərbi və iqtisadi təsiri hələ böyük olsa da, onun Ermənistandakı "yumşaq gücü" sürətlə zəifləyir. Onların fikrincə, artıq 2028-ci ildə Ermənistan Avropa İttifaqı ilə vizasız rejim əldə edə bilər. Sual isə budur: Kreml buna nə ilə cavab verəcək?