ABŞ-də inflyasiya son üç ilin maksimumuna çatdı

Cari ilin aprel ayında Amerika Birləşmiş Ştatlarında (ABŞ) inflyasiya tempi 3.8% səviyyəsində qeydə alınıb. Bu, təxminən son üç ilin ən yüksək göstəricisidir.

Moderator.az xəbər verir ki, müvafiq statistik məlumatlar ABŞ Əmək Nazirliyinin ixtisaslaşmış bölməsi tərəfindən açıqlanıb. Qurumun hesabatına əsasən, aprel ayında ölkə üzrə qiymətlərin artımı 0.6% təşkil edib (müqayisə üçün: bu göstərici martda 0.9%, fevralda isə 0.3% olub). İllik inflyasiya göstəricisinin 3.8%-ə yüksəlməsi ilk növbədə energetika sektorundakı artımla, eləcə də ABŞ və İsrailin İrana qarşı apardığı hərbi əməliyyatların fəsadları ilə əlaqələndirilir.

Nazirliyin məlumatına görə, ötən ay ABŞ-də benzinin qiyməti 5.4%, ümumi enerji daşıyıcılarının qiyməti isə 3.8% bahalaşıb.

Beynəlxalq Valyuta Fondu (BVF) hələ martın 30-da xəbərdarlıq etmişdi ki, regiondakı hərbi əməliyyatlar qlobal miqyasda qiymət artımına və iqtisadi artımın ləngiməsinə səbəb olacaq. Təşkilatın açıqlamasında bildirilir ki, davamlı münaqişə neft və qazın kəskin bahalaşması ilə nəticələnə bilər. Bu isə enerji idxalından asılı ölkələr üçün ciddi iqtisadi çətinliklər yaradacaq.