"Sülh ümidləri sönür: Tramp İranla Pakistan danışıqlarını niyə ləğv etdi?" - "Reuters"

"Diplomatik proses dalana dirənir, tərəflər geri addım atmır..."

ABŞ və İsrailin İranla iki aydır davam edən müharibəsini dayandırmaq cəhdləri nəticəsiz qalıb.

Moderator.az xəbər verir ki, bu barədə "Reuters" agentliyi məlumat yayıb.

Danışıqların dalana dirənməsi

Məlumatda deyilir ki, yeni həftənin əvvəlində diplomatik irəliləyiş ümidləri demək olar ki, sönüb - tərəflər öz şərtlərini yumşaltmaq istəmir və danışıqlar faktiki olaraq dalana dirənib.

İranın xarici işlər naziri Abbas Araqçı vasitəçi rolunu oynayan Pakistandan nəticəsiz qayıdıb. ABŞ prezidenti Donald Tramp isə nümayəndələri - xüsusi elçi Stiv Uitkoff və keçmiş müşavir Cared Kuşnerin İslamabada planlaşdırılan səfərini ləğv edib. Bu addımlar sülh perspektivlərinə ciddi zərbə vurub.

Mövcud vəziyyət qlobal iqtisadiyyata da təsir edir: enerji qiymətləri uzun illərin maksimumuna yaxınlaşıb, inflyasiya təzyiqi artıb və iqtisadi artım perspektivləri zəifləyib.

İran və ABŞ-ın sərt mövqeləri

İran prezidenti Məsud Pezeşkian Pakistanın baş naziri Şahbaz Şəriflə telefon danışığında bildirib ki, Tehran "təzyiq və blokada altında məcburi danışıqlara" getməyəcək. Onun sözlərinə görə, ABŞ əvvəlcə İran limanlarına tətbiq edilən blokada kimi "əməli maneələri" aradan qaldırmalıdır. Eyni zamanda, rəsmi Tehran Vaşinqtonun "maksimalist tələblərini" qəbul etməyəcəyini açıq şəkildə bəyan edir.

Donald Tramp isə danışıqların ləğvini İranın təqdim etdiyi təklifin zəif olması ilə izah edib. Onun sözlərinə görə, bu cür təklif üçün uzun səfərlər və xərclər mənasız idi. Tramp həmçinin bildirib ki, İran rəhbərliyi daxilində "qarışıqlıq hökm sürür" və əlavə edib: "Bizim bütün kartlar əlimizdədir, onların isə heç nəyi yoxdur".

Bitməyən qarşıdurma və artan gərginlik

İran rəhbərliyi ölkə daxilində fikir ayrılığı olmadığını və hamının ali liderin ətrafında birləşdiyini vurğulayır. Paralel olaraq regionda gərginlik daha da artır: İsrailin baş naziri Benyamin Netanyahunun əmri ilə Livanda "Hizbullah" hədəflərinə zərbələr endirilib.

Tehran isə qlobal enerji bazarına təsir edən addım ataraq Hörmüz boğazını demək olar ki, tam bağlayıb. Bu marşrut dünya neft və mayeləşdirilmiş qaz tədarükünün böyük hissəsi üçün kritik əhəmiyyət daşıyır. Formal atəşkəs rejiminə baxmayaraq, münaqişə faktiki olaraq davam edir. 

ABŞ və İsrailin fevralın 28-də İrana endirdiyi zərbələrdən sonra Tehran da cavab hücumları həyata keçirib və qarşıdurma geniş regional böhrana çevrilib. Son olaraq Tramp bildirib ki, danışıqları ləğv etdikdən cəmi 10 dəqiqə sonra İran daha yaxşı yeni təklif göndərib. Onun sözləri ilə desək, Tehran "çox şey təklif edir, amma bu hələ də kifayət deyil".