Bu gün - dekabrın 16-da tanınmış jurnalist, şəhid  Milli Qəhrəmanımız Salatın Əsgərovanın anadan olmasının 60 illik yubileyi qeyd olunur. Bu münasibətlə müxtəlif tədbirlər keçirilir. Lakin 1991-ci il yanvarın 9-da jurnalistimizin qətlə yetirildiyi Şuşa rayonunun Şuşa-Laçın yolu üzərində yerləşən rəsmən Sarıbaba adlandırılmış kənd artıq  30 ilə yaxındır ki, faktiki olaraq erməni işğal altında qalmaqdadır.    

Salatın Əsgərova ilə yanaşı, 3 rus hərbçisi də Böyük Qaladərəsi və Kirov(indi Kiçik Qaladərəsi) kəndlərində  toplanmış erməni terrrorçuları tərəfindən edilən silahlı hücum nəticəsində  məhz bu kəndin ərazisində qətlə yetirilib. Elə həmin il Azərbaycan parlamentinin qərarıyla  kənd qəhrəman jurnalistimizin xatirəsinə Salatınkənd adlandırılıb. Lakin sonradan nədənsə həmin qərar Azərbaycan hökuməti tərəfindən rəsmiləşdirilməyib. Milli Məclisin dünən – 15 dekabrda keçirilən iclasında Mədəniyyət Komitəsinin sədri, deputat Qənirə Paşayeva  sözügedən kəndə Salatın Əsgərovanın adının verilməsi təklifi ilə çıxış edib(Bu sətirlərin müəllifi 1991-ci ildən bəriki bütün yazılarında həmin məntəqəni Salatınkənd kimi göstərib)...

 

Moderator.az Şuşa rayonunun 10 noyabr 2020-ci il  bəyanatına əsasən  Rusiya “sülhməramlı”larının nəzarətində qalmış  bəhs edilən kəndindəki hazırkı vəziyyət barədə kiçik araşdırma aparıb. 

Salatınkənd, yaxud Sarıbaba kəndi  Şuşa-Laçın yolu üzərində,  Laçından təxminən 10 km məsafədə,  dağətəyi ərazidədir. Yaşayış məntəqəsində XIX əsrdə İrandan köçüb gəlmiş erməni ailələri yerləşdirilmiş və sonralar Yextsahog (erm. “kilsa yeri”) adlandırılmışdı.

 

Hazırda Azərbaycan rəsmən Respublikasının Şuşa rayonunun  ərazisi sayılan  Salatınkənd(Sarıbaba) kəndində 145 nəfər erməni yaşayır. 44 günlük savaşdan sonra kəndə qanunsuz olaraq Laçın rayonunun Köhnəkənd kəndində məskunlaşmış 1, Qubadlıdan 1 və Xocavənd  rayonunun "Arşat" adlandırılan kəndindən  2 erməni ailəsi  köçürülüb.

 

Kənddəki mövcud vəziyyət barədə  Xankəndindəki erməni nəşrlərinə kənddəki qanunsuz erməni “icması”nın rəhbəri Artak Akopyan danışıb.

 

44 günlük müharibədən sonra  kənddə 4 köçkün ailə məskunlaşıb. İndi köçkünlərimiz üçün bir neçə ev təmir olunur. Məktəbimizdə 18 şagird var. İcma binası qəzalı vəziyyətdədir, əsaslı təmir tələb edir. Tibb mərkəzimiz fəaliyyət göstərir, binasının təmirə ehtiyacı var. Kəndarası yollar yaxşı vəziyyətdədir. Kənd qaz və işıqla təmin olunub. İndi burada yeni su kəməri çəkilir”, - deyə A.Akopyan bildirib.

 

 Kənd sakinlərinin məşğulluğundan danışan A.Akopyan qeyd edib ki, onların əsas məşğuliyyət istiqaməti heyvandarlıqdır. Kənd təsərrüfatı və arıçılıq inkişaf edib.

 

Xatırladaq ki, bu ilin avqustunda erməni mediasında Ermənistan silahlı qüvvələrinin Azərbaycan Respublikası Şuşa rayonunun Salatınkənd(yaxud Sarıbaba) kəndindən çıxarılması ilə bağlı məlumatlar yayılsa da,  sonradan həmin məlumat Ermənistan silahlı qüvvələri Baş Qərargahı tərəfindən təkzib edib.

 

Tam dəqiqlıəşdirilməmiş məlumatlara görə, hazırda Salatınkəndin yaxınlığındakı Sarıbaba yüksəkliyi Azərbaycan ordusunun bilavasitə nəzarəti altındadır. 

 

Qeyd edək ki, 10 Noyabr üçtərəfli razılaşmasına əsasən Laçın-Şuşa-Xankəndi yolundan hər iki tərəfə hava ilə  2,5 km məsafədəki ərazi Rusiya sülhməramlı(!) hərbi kontingentinin məsuliyyət zonasıdır. Salatınkənd(yaxud Sarıbaba) isə avtomobil yolundan azı 600-700 metr məsafədə yerləşir.  Bununla belə hesablama həmin kənddən deyil, Laçın-Şuşa yolundan aparılmalıdır. Və hətta Salatınkənddən hesablansa belə, Sarıbaba yüksəkliyi hava xətti ilə 4 km-dən çox məsafədədir. Buna görə də həmin yüksəklikdən Azərbaycan ordusu çıxa bilməz. Digər tərəfdən, dəniz səviyyəsindən 2295 metr(bəzi mənbələrə görə 2334 metr) hündürlükdə olan Sarıbaba zirvəsi məhz Şuşa və Laçın rayonlarının, yaxud keçmiş Dağlıq Qarabağ Muxtar Vilayəti ilə  Laçın rayonunun şərti sərhədi üzərində yerləşir...

 

O da unudulmamalıdır ki, öncə qeyd etdiyimiz kimi,  Salatınkənd də Qarabağda XX əsrin əvvəli və sonundakı münaqişə dövründə Şuşanın Qaladərəsi, Kirov, Daşaltı və s. kəndləri kimi terrorçu oylağı olub. Salatın Əsgərovadan əlavə, bu kənddə Şuşa və Laçın rayonunun sakinlərinə qarşı bir sıra terror aktları həyata keçirilib...

 

Sultan Laçın