Yadigar Sadıqov Bakı İstintaq Təcridxanasına köçürülüb

Siyasət

Oxunub: 2725

01 Jul 2013 | 10:32

Yadigar Sadıqov Bakı İstintaq Təcridxanasına köçürülüb

Müsavat başqanının həbs edilən müşaviri Yadigar Sadıqov iyunun 30-da Bakı İstintaq Təcridxanasına köçürülüb. Lənkəran Rayon Polis Şöbəsində (RPŞ) saxlanan Müsavat fəalı artıq Bakıya gətirilib. Bu barədə "facebook"da xəbər yayan partiyanın Masallı təşkilatının sədri Xasay Səfəroğlu qeyd edib ki, ona anası ilə görüş verilməyib.

Vəkili Nemət Kərimli isə “Yeni Müsavat”a məlumat verdi ki, gecə saatlarında BİT-a gətirilən Y.Sadıqova xalası oğlu yemək aparıb. Amma yeməyi buraxmayıblar. Vəkil bunu qanunazidd addım sayır. Onun sözlərinə görə, iyulun 1 və ya 2-də həbs - qətimkan tədbiri ilə bağlı apelyasiya şikayəti veriləcək.

Vəkil bildirdi ki, Y.Sadıqovun işinə sədrlik edən Lənkəran Rayon Məhkəməsinin sədri Elçin Kazımov proses zamanı bir neçə aşkar qanunsuzluğa yol verib: "Bu dərəcədə kobud və qanunları saymayan hakimlə ilk dəfə qarşılaşdığını deyən vəkilin sözlərinə görə, vəsatətlərin heç biri təmin olunmadı: “Adətən belə işlərə sədr yox, hakim çıxır. Ancaq siyasi sifariş olduğuna görə bu dəfə Kazımov özü çıxıb ki, yuxarı dairələrdə divident qazansın. Kobud bir hakim kimi yadda qaldı. Biz işlə bağlı təqdimatla tanış ola bilmədik, hakim onu bizə vermədi. Bu açıq qanunsuzluqdur. Bundan başqa, proses qapalı keçirilməli idi. Ancaq yarımqapalı keçirildi. Məhkəmə zalında polislər və mülki geyimli şəxslər iştirak edirdi. Tamamilə qanunvericiliyə zidd hərəkətlərlə məhkəmə yekunlaşdı”.

“Mən Qarabağ əlillərini hamısını tanıyırdım. İndi üzdən görsəm yəqin ki, tanıyaram. Amma çox təəssüfedici haldır ki, artıq siyasi proseslərdə fəal olan şəxslərin həbsinə Qarabağ əlilinin vasitəsi ilə nail olurlar”. Bu sözləri açıqlamasında “Qarabağ qaziləri” İctimai birliyinin sədri Etimad Əsədov Y.Sadıqovun həbsinə münasibət bildirərkən dedi. Onun sözlərinə görə, əndazəni aşmağa başlayıblar: “Elə mühit yaradılmalıdır ki, hər kəs seçkidə azad iştirak edə bilsin. Amma artıq Qarabağ əlilindən istifadə etməyə başlayıblar. Qarabağ əlili ilə siyasi fəalları üz-üzə qoyub həbsinə nail olurlar. Çox utancverici bir hadisədir. Söz tapmıram deməyə”.

Talış Ağsaqqallar Şurası da Müsavat fəalının həbsini pisləyən bəyanat yayıb: “Alimin cibinə narkotik, dindarın evinə silah ataraq həbs etməyə öyrənmiş hakim təbəqə indi də vətənin müdafiəsində iştirak edib, əlil olanı mənəviyyata zidd üsullarla məcbur edib, sağlam düşüncəli bir insanın - Yadigar Sadıqovun üzünə durduraraq həbs edilməsinə qərar verib. Talış Ağsaqqallar Şurası Yadigar Sadıqovun həbsini pisləyərək, onun dərhal azad edilməsini tələb edir.

Onun həbsinə qərar verən iqtidar səlahiyyətlilərinin diqqətinə çatdırmaq istəyirik ki, talış xalqı bütövlükdə iqtidarın bu cür qanundankənar hərəkətlərinə gec-tez öz güclü ümumxalq etiraz hərəkatı ilə layiqli cavab verəcəkdir. Səbrin də bir həddi-hüdudu olur".

Bir nüansa diqqət çəkək - artıq hakimiyyət müxalifləri həbs etmək üçün yeni mexanizmin tətbiqinə başlayıb. Əvvəllər fəalların narkotik ittihamı ilə tutulması tendensiyası müşahidə olunurdu. Az qala ucdantutma bütün müxalifətçilər narkoman “çıxarılırdı”. Sonra bu texnologiyanın effekt vermədiyini, yerli və beynəlxalq ictimai rəydə istehza ilə qarşılandığını başa düşdülər. İndi müxalif fəalları şərləyərək, üzlərinə müxtəlif adamları durğuzmaqla zindana salırlar. Bunu da Y.Sadıqovun həbsində bariz nümunəsini gördük. Müsavatçı Qarabağ əlilini döyməkdə ittiham olunur.

Xatırladaq ki, Y.Sadıqov iyunun 27-də Lənkəran sakini Rəşid Kərimovun şikayəti əsasında şübhəli şəxs kimi həbs edilib. Kərimov bildirir ki, iyunun 25-də Sadıqov onu döyüb. Kərimovun müraciəti KİV-də yayılıb və onun əsasında Lənkəran rayon Polis İdarəsi onun barəsində Cinayət Məcəlləsinin 221.3 (silah və ya silah kimi istifadə edilən predmetdən istifadə ilə xuliqanlıq) maddəsi ilə cinayət işi açıb.