ABU-nun sabiq rektoru Elşad Abdullayevin şikayəti əsasında həbs edilən iş adamı Arzu Kazımovun məhkəməsi davam etdikcə ortaya yeni detallar çıxır. A.Kazımovun vəkili Ramiz Zeynalov “Təzadlar”a müsahibəsində ilginc açıqlamalar verib.  R.Zeynalov bildirib ki, Elşad Abdullayevin qardaşı, Baş Prokurorluqda istintaqa nəzarət edən idarənin böyük prokuroru işləyən Elsevər Abdullayevin 8 noyabr 2012-ci ildə Baş Prokurorluqda istintaqa verdiyi ifadəsi sübut edir ki, sabiq rektor yalan danışır: “Elsevər Abdullayevin istintaqa verdiyi həmin ifadəsində olduqca ciddi məsələlər vardır. Məsələn, Elsevər Abdullayev müstəntiqin ”M.Abdullayevin idarə etdiyi “Mercedes-Benz” markalı 10-CR-067 dövlət nömrə nişanlı avtomaşınının tapılması barədə nə göstərə bilərsiniz" sualına belə cavab verir: “2003-cü ilin noyabr ayının 17-si, ya da 18-i idi. Qardaşım Mahirin itkin düşməsi ilə əlaqədar olaraq mən saat 10 radələrində Elşadgildə idim. Həmin gün və ACDİÜ Məhkəməsinin hakimi Abid Abdinbəyov mənə mobil telefonu ilə zəng edərək bildirdi ki, saat 11-00-da məhkəmə prosesi olacaq və dövlət ittihamçısı kimi iştirakın zəruridir. Ona görə də mən Elşadgildən birbaşa məhkəməyə getdim. Mənim yolumu ”VAZ-2106" maşını kəsdiyinə görə məcbur olub sola dönərək məscid tərəfdən məhkəməyə yolumu davam etdirmək istədim. Lakin sola dönəndən sonra 43 saylı MİS-in qarşısında metallik rəngli 10-CR-067 dövlət nömrə nişanlı “Mercedes-Benz” i görərək maşınımı saxladım, çünki dayanmış həmin avtomobil Mahirə məxsus idi. Mən maşına toxunmadan xaricdən baxış keçirdim, gördüm ki, tərtəmiz yuyulmuş vəziyyətdədir. Elə bil ki, bu dəqiqə qarajdan çıxarıblar. Mən qardaşlarım Elşad və Eldənizə zəng edərək avtomaşının tapılmasını onlara bildirməklə fotoaparat gətirmələrini xahiş etdim. Əvvəl verdiyim ifadələrimə qismən dəyişiklik edərək bildirmək istəyirəm ki, fotoaparatın gətirilməsini mənim xahiş etməyimə baxmayaraq, şəkilləri Elşadın göstərişi ilə ora gələn qohumu Şamil çəkmişdir. Bundan sonra mən DİN-nin sabiq müavini Zahid Dünyamalıyevə zəng etdim, bildirdim ki, mən axtardığım dördtəkərli şeyi tapmışam, xahiş etdim ki, etibar etdiyi şəxslərdən kimlərsə gəlib avtomaşına baxış keçirsinlər. Təxminən yarım saat sonra iki nəfər ağbaş, mülki geyimdə olan orta boylu idmançı bədən quruluşlu əməkdaşlar gəlib bildirdilər ki, onları Zahid Dünyamalıyev göndərib. Onlar maşına baxış keçirdilər, sonra maşını Mahirin yaşadığı ərazidə avtodayanacağa aparıb saxladıq. Baxış zamanı maşının salonundan bir neçə uzun sarı rəngli tüklər çıxdı. Maşına baxış keçirən iki nəfər şəxs həmin tükləri ağ kağıza büküb maşının qoltuqaltı saxlanc yerinə qoydular... Panelin sərnişin oturan tərəfi, qabaq əl tutacağı və sağ oturacağın damında qana oxşar qırmızı rəngli damcılar var idi. Onu da qeyd etmək lazımdır ki, avtomaşının ehtiyat açarını Elşadın öz arvadı tərəfindən qohumu olan Şamil gətirmişdi...".