"Rusiya-Ukrayna müharibəsi: dəmir yolu və limanlara zərbələr" - Ukrayna KİV-ləri

Bizi sosial şəbəkələrdən izləyin:

"Gecə hücumlarında itkilər var, Kiyev isə cavab olaraq hərbi obyektləri vurur..."

Aprelin 22-nə keçən gecə Rusiya ordusu Ukraynanın müxtəlif bölgələrinə dron hücumları həyata keçirib.

Moderator.az xəbər verir ki, bu barədə "nv.ua" nəşri məlumat yayıb.

Zaporojye və Odessa zərbələri

Məlumatda deyilir ki, əsas zərbələrdən biri Zaporojye vilayətindəki "Zaporojye-Levoye" dəmir yolu stansiyasına dəyib. Ukraynanın bərpa üzrə vitse-premyeri Aleksey Kulebanın sözlərinə görə, zərbə zamanı relslərdə elektrovozlu qatar olub və nəticədə maşinistin köməkçisi ölümcül xəsarət alıb, maşinist isə yaralanaraq xəstəxanaya yerləşdirilib.

Eyni gecə Odessa vilayətində liman infrastrukturu da hücuma məruz qalıb. Rəsmilərin bildirdiyinə görə, zərbələr nəticəsində körpülər, anbarlar, dəmir yolu xətləri və liman obyektləri zədələnib. İlkin məlumata əsasən, burada xəsarət alan yoxdur.

Digər bölgələr və kütləvi dron hücumu

Hücumlar bununla məhdudlaşmayıb. Dnepr şəhərində yaşayış binaları və avtomobillər zərər görüb, Nikopol rayonunda isə yanğın baş verib. Xarkov vilayətində kənd təsərrüfatı müəssisəsinə zərbə nəticəsində inzibati binada yanğın çıxsa da, ölən və yaralanan olmayıb.

Ukrayna Hərbi Hava Qüvvələrinin məlumatına görə, Rusiya gecə ərzində "Shahed", "Gerbera" və digər tipli ümumilikdə 200-dən çox zərbə dronu buraxıb. Onların böyük hissəsi HHM tərəfindən vurulsa da, bir neçə ərazidə düşmə və dağıntılar qeydə alınıb.

Ukraynanın cavab zərbələri

Digər tərəfdən, Ukrayna Silahlı Qüvvələrinin Baş Qərargahı 21-22 aprel tarixlərində Rusiya və işğal olunmuş ərazilərdə bir sıra hərbi obyektlərin vurulduğunu açıqlayıb. Bildirilir ki, Sevastopolda Qara dəniz donanmasının hərəkətini idarə edən "Streletskiy" məntəqəsi hədəfə alınıb.

Bundan əlavə, Kursk və Xarkov istiqamətlərində pilotsuz aparatların idarəetmə mərkəzləri, həmçinin Belqorod və Donetsk bölgələrində komanda məntəqələri vurulub. Baş Qərargah qeyd edib ki, "düşmənin itkiləri və zərərin miqyası dəqiqləşdirilir" və Ukrayna əməliyyatları davam etdirir.