"Rusiya NATO-nu parçalamağa çalışır" - Niderland kəşfiyyatı

Bizi sosial şəbəkələrdən izləyin:

"Moskvanın məqsədi hərbi qələbə deyil, siyasi parçalanma yaratmaqdır..."

Rusiya yeni qarşıdurmaya hazırlaşır

Niderlandın Hərbi Kəşfiyyat və Təhlükəsizlik Xidməti (MIVD) 2025-ci il üzrə hesabatında bildirir ki, Rusiya Ukraynadakı müharibədən sonra əlverişli şərait yaranarsa, bir il ərzində NATO ilə mümkün regional qarşıdurmaya hazır ola bilər.

Moderator.az xəbər verir ki, bu barədə "dw.com" nəşri məlumat yayıb.

Sənədə görə, Moskva artıq belə ssenariyə konkret hazırlıq görür.

Kəşfiyyatın qiymətləndirməsinə əsasən, Rusiyanın əsas hədəfi NATO-nu hərbi cəhətdən məğlub etmək deyil. Əksinə, məqsəd məhdud ərazi uğurları hesabına alyans daxilində siyasi parçalanma yaratmaqdır. Hesabatda qeyd olunur ki, bu məqsədə çatmaq üçün Kreml lazım gəldikdə nüvə şantajından da istifadə edə bilər.

"Gizli müharibə" alətləri və strateji məqsədlər

MIVD Rusiyanı Avropada sabitlik üçün "ən böyük və birbaşa təhlükə" kimi qiymətləndirir. Bildirilir ki, Moskva artıq təkcə hərbi vasitələrlə deyil, kiberhücumlar, dezinformasiya kampaniyaları, təxribat və casusluq yolu ilə də Qərb ölkələrinə təsir göstərməyə çalışır.

Ekspertlər hesab edir ki, bu fəaliyyətlər Rusiyaya NATO ilə açıq müharibə həddini keçmədən qarşıdurmanı davam etdirməyə imkan verir. Ukraynaya qarşı müharibə isə daha geniş məqsədin - Avropanın təhlükəsizlik arxitekturasını dəyişmək və Rusiyanın əsas güc mərkəzlərindən biri olduğu çoxqütblü dünya qurmaq planının bir hissəsi kimi dəyərləndirilir.

Eyni zamanda, silah nəzarəti mexanizmlərinin zəifləməsi və beynəlxalq institutların təsirinin azalması da qeyd olunur. Hesabatda süni intellekt, kvant texnologiyaları və biotexnologiya kimi yeni sahələrin gələcək təhlükəsizlik mühitini daha da qeyri-müəyyən etdiyinə diqqət çəkilir.

Nəzarətdən çıxan eskalasiya riski

Kəşfiyyat sənədində vurğulanır ki, mövcud vəziyyət "təsadüfi və nəzarəti çətin olan eskalasiya" riskini artırır. Xüsusilə ABŞ-ın təhlükəsizlik siyasətindəki qeyri-müəyyənliklərin Rusiyanın qərarlarına təsir göstərə biləcəyi qeyd olunur.

Hesabatın təqdimatı zamanı Piter Risink Avropanı öz təhlükəsizliyi üçün daha çox məsuliyyət götürməyə çağırıb. Onun sözlərinə görə, "uzun illər güvəndiyimiz beynəlxalq sistem artıq ciddi təzyiq altındadır" və bu şəraitdə Avropa həm müdafiə, həm də kəşfiyyat sahəsində daha müstəqil olmalıdır.