Avropa İttifaqı və NATO müdafiədə birləşir: yeni mərhələ başlayır - "Deutsche Welle"

Bizi sosial şəbəkələrdən izləyin:

Silah istehsalının artırılması, Ukraynaya dəstək və təhlükəsizlik çağırışları fonunda əməkdaşlıq dərinləşir...

Avropa İttifaqı (Aİ) ilə NATO arasında müdafiə sahəsində əməkdaşlıq yeni mərhələyə qədəm qoyur.

Moderator.az xəbər verir ki, bu barədə "dw.com" nəşri yazıb.

Brüsseldə razılaşma: daha çox istehsal, daha sürətli qərarlar

Nəşr yazır ki, NATO-nun baş katibi Mark Rütte və Avropa Komissiyasının rəhbəri Ursula fon der Lyayen Brüsseldə keçirilən görüşdə Avropada silah istehsalının artırılmasının vacibliyini vurğulayıblar.

Fon der Lyayen bildirib ki, "biz daha çox investisiya etməli, daha çox istehsal etməli və bunu daha sürətli həyata keçirməliyik". Bu çağırış Avropanın artan təhlükəsizlik riskləri fonunda müdafiə qabiliyyətini gücləndirmək məqsədi daşıyır.

Ukraynaya dəstək və infrastrukturun qorunması prioritetdə

Görüş zamanı əsas müzakirə mövzularından biri Ukraynaya dəstəyin davam etdirilməsi olub. NATO rəhbərliyi bildirir ki, Ukraynanın Rusiyanın hücumlarına qarşı müdafiəsi və kritik infrastrukturun qorunması Aİ ilə NATO arasında əməkdaşlığın mərkəzində dayanır.

Mark Rütte qeyd edib ki, bu sahələrdə koordinasiya "son dərəcə vacibdir" və əlavə edib: "Daha güclü Avropa daha güclü NATO deməkdir". Tərəflər həmçinin qarşıdakı NATO sammitinə hazırlıq məsələlərini də müzakirə ediblər və təhlükəsizlik risklərinin artdığı bir dövrdə əlaqələrin daha da möhkəmləndirilməsi barədə razılığa gəliblər.

Maliyyə qərarları və əsas problem: istehsalın ləngliyi

Son illərdə həm NATO, həm də Avropa İttifaqı müdafiə xərclərini ciddi şəkildə artırmaq qərarı verib. Alyans üzvləri ÜDM-in 3,5 faizini müdafiəyə, əlavə olaraq isə 1, 5 faizini müdafiə ilə bağlı sahələrə yönəltməyi planlaşdırır. Avropa İttifaqı isə yaxın illərdə silah istehsalı və alınması üçün 800 milyard avro ayırmağı nəzərdə tutur.

Bununla belə, əsas problem hələ də qalır: müdafiə sənayesinin inkişaf tempi yetərincə sürətli deyil. Aİ-nin müdafiə üzrə komissarı Andryus Kubilyus qeyd edib ki, Rusiya hələ də Avropa İttifaqından daha çox silah istehsal edir. Bu vəziyyət Aİ və NATO-nu daha sürətli və koordinasiyalı addımlar atmağa vadar edir, çünki mövcud təhlükəsizlik mühiti gecikmələrə yer qoymur.