Roma Papası XIV Leo süni intellektə qarşı çıxdı

Roma Papası XIV Leo bəyan edib ki, müharibə şəraitində süni intellektdən istifadə etik çərçivələrə uyğunlaşdırılmalıdır.

Moderator.az xəbər verir ki, bu barədə pontifikin "Magnifica Humanitas" ("İnsan olaraq qalaq") adlanan ilk ensiklikasında məlumat verilir.

Pontifikin fikrincə, süni intellekt üzərində nəzarət yalnız kiçik bir qrupun əlində cəmləşməməlidir, texnologiyalar isə qlobal münaqişələri daha da alovlandırır. Sənəddə sürətlə inkişaf edən texnologiyalar fonunda unikal bəşəri əzəməti qorumağın vacibliyi vurğulanır. Həmçinin süni intellektin hərbi sahədə tətbiqinin ən sərt etik qaydalara tabe olması tələb edilir.

Papa əlavə edib ki, müharibənin hansı hallarda haqlı sayıla biləcəyini müəyyən edən dörd prinsipli xristian təlimi artıq öz aktuallığını itirib. Onun sözlərinə görə, hərbi gücdən yalnız ən ciddi mənada özünümüdafiə məqsədilə istifadə oluna bilər.

"Daimi münaqişə vəziyyətində olan bir dünya yaratmaq pislikdir və bunu öz adı ilə çağırmaq lazımdır... Bəşəriyyətin insan həyatını qorumaq və anlaşılmazlıqları həll etmək üçün dialoq, diplomatiya və bağışlamaq kimi daha səmərəli vasitələri mövcuddur", - deyə XIV Leo yazır.

Qeyd edək ki, ensiklika mühüm sosial-siyasi, dini və mənəvi məsələlərə dair əsas Papa sənədi hesab olunur.