ABŞ-İran saziş layihəsində nələr var?

İran və ABŞ arasında yeni saziş layihəsi bütün cəbhələrdə hərbi əməliyyatların dayandırılmasını nəzərdə tutur.

Moderator.az-ın xəbərinə görə, bu barədə "Əl-Ərəbiyyə" məlumat yayıb.

Telekanalı 10 bənddən ibarət sənədin tam versiyasını dərc edib.

Saziş aşağıdakıları nəzərdə tutur:

- Quru, dəniz və hava da daxil olmaqla, bütün cəbhələrdə dərhal, hərtərəfli və qeyd-şərtsiz atəşkəs;

- Hərbi, mülki və ya iqtisadi infrastruktura zərbələr endirilməməsi ilə bağlı qarşılıqlı öhdəlik;

- Hərbi əməliyyatlara və informasiya müharibəsinə son qoyulması;

- Suverenliyə, ərazi bütövlüyünə hörmət və ölkələrin daxili işlərinə müdaxilə edilməməsi;

- Fars körfəzi, Hörmüz boğazı və Oman körfəzində gəmi nəqliyyatının azad edilməsi;

- İcranın monitorinqi və mübahisələrin həlli üçün birgə mexanizm;

- Yeddi gün ərzində həll olunmamış məsələlər üzrə danışıqların keçirilməsi;

- İranın sazişin şərtlərinə sadiq qalması müqabilində ABŞ sanksiyalarının tədricən aradan qaldırılması;

- Sazişin beynəlxalq hüquqa və BMT Nizamnaməsinə uyğunluğu;

- Sənədin hər iki tərəf rəsmi elan etdikdən dərhal sonra qüvvəyə minməsi.

"Əl-Ərəbiyyə"ni bilgiləndirən mənbələrinin sözlərinə görə, layihənin yekun variantının yaxın bir neçə saat ərzində elan edilməsi gözlənilir. Sənəddə İranın nüvə silahlarından bəhs edilmir.

Xatırladaq ki, İran və ABŞ arasında 8 apreldən bəri atəşkəs rejimi qüvvədədir. ABŞ Prezidenti Donald Tramp İranın nüvə silahlarından imtina etməyə razı olduğunu iddia edib. Həmçinin ABŞ bu həftə İrana yeni sülh sazişi layihəsini təqdim edib.