"ABŞ və Avropa narahatdır: İranın müqavimət ruhu sarsılmır" - "Die Welt"

Bizi sosial şəbəkələrdən izləyin:

"Yaxın Şərqdəki müharibə Çinin mövqelərini gücləndirib, Vaşinqtonun çəkindirici gücü isə zəifləyib..."

Vaşinqtonun Tehrana qarşı həyata keçirdiyi hərbi strategiya gözlənilən nəticəni verməyib və bu proses həm ABŞ-ın, həm də Qərbin mövqelərini zəiflədib.

Moderator.az xəbər verir ki, bu barədə Almaniyanın "Die Welt" nəşri yazıb.

Nəşr yazır ki, son həftələrdə İran raket arsenalını yenidən bərpa etməyə nail olub və ABŞ ilə İsrail faktiki olaraq əvvəlki vəziyyətə qayıdıb. Məqalədə qeyd olunur ki, İranın müqavimət ruhu zəifləməyib, əksinə, ABŞ-nin çəkindirmə potensialı minimum həddə enib.

Tramp müharibəyə seçki şousu kimi yanaşdı

"Die Welt" məsuliyyətin əsas hissəsini ABŞ prezidenti Donald Trampın üzərinə qoyur. Nəşr Trampı emosional və xaotik qərarlar verməkdə, hərbi ekspertlərin xəbərdarlıqlarını nəzərə almamaqda ittiham edir.

Məqalədə iddia olunur ki, Ağ Ev rəhbəri İran hakimiyyətinin qısa müddətdə çökəcəyinə inanıb və hərbi əməliyyatı genişmiqyaslı strategiya kimi deyil, seçki kampaniyasındakı çıxışlarına bənzər şəkildə planlaşdırıb.

Nəşr yazır ki, ABŞ qoşunları tələsik şəkildə Uzaq Şərqdən Hörmüz boğazına yönəldilib, Asiyadakı müttəfiqlərdən hava hücumundan müdafiə sistemləri geri çəkilib, lakin mümkün quru əməliyyatı ilə bağlı təkliflər diqqətdən kənarda qalıb.

İranın müqaviməti qırılmadı

Məqalədə 1991-ci ildə İraqa qarşı həyata keçirilmiş "Səhrada tufan" əməliyyatı ilə indiki vəziyyət müqayisə olunur. Nəşr qeyd edir ki, o dövrdə ABŞ uzun hazırlıq aparıb, beynəlxalq koalisiya yaradıb və genişmiqyaslı hərbi plan hazırlayıb. Hazırkı münaqişədə isə belə strategiyanın olmadığı vurğulanır.

Nəşr hesab edir ki, ABŞ hava zərbələrinin ilkin uğurunu davam etdirə bilməyib və nəticədə İran rəhbərliyi mövqelərini qorumağa nail olub. Qeyd olunur ki, İsrail kəşfiyyatı Vaşinqtona kürd qüvvələrinin silahlandırılması ilə bağlı təklif təqdim etsə də, Tramp bunu rədd edib.

Nəşr bildirir ki, ABŞ administrasiyası müharibənin əsas məqsədini dəqiq müəyyənləşdirə bilməyib: bir müddət rejim dəyişikliyindən, daha sonra zənginləşdirilmiş uranın ələ keçirilməsindən, daha sonra isə İran rəhbərliyinə qarşı hədəflərdən danışılıb.

Müharibə Çinin mövqelərini gücləndirib

"Die Welt" hesab edir ki, yaranmış vəziyyət Avropada da ciddi narahatlıq yaradır. Məqalədə bildirilir ki, Avropa bir tərəfdən İranın nüvə imkanlarının zəifləməsini istəyir, digər tərəfdən isə ABŞ-nin zəifləyən təsir imkanlarını və Çinin sürətlə güclənməsini izləyir.

Nəşrin fikrincə, Yaxın Şərqdəki müharibə nəticəsində ən böyük geosiyasi üstünlük qazanan tərəflərdən biri məhz Çin olub. Məqalə müəllifi vurğulayır ki, Pekin qısa müddətdə və birbaşa müdaxilə etmədən qlobal mövqelərini daha da gücləndirə bilib.