"Azad seçkilər təhlükədə: Avropa Şurası Rusiyanı Ermənistanın daxili işlərinə müdaxilədə ittiham edir" - "Deutsche Welle"

"AŞPA nümayəndə heyəti İrəvanda keçiriləcək parlament seçkiləri ərəfəsində xarici təsir, dezinformasiya və siyasi təzyiqlərin artdığını bildirir..."

Avropa Şurası Ermənistanda iyunun 7-də keçiriləcək parlament seçkilərinin azad və ədalətli olmasına ciddi risklər olduğunu bildirib.

Moderator.az xəbər verir ki, bu barədə "dw.com" nəşri yazıb.

Seçki mühitinə xarici müdaxilə xəbərdarlığı

Avropa Şurası Parlament Assambleyasının (PACE) nümayəndə heyəti İrəvana səfərdən sonra yayımladığı bəyanatda seçki prosesinə xarici müdaxilənin getdikcə daha "sistemli və mürəkkəb xarakter" aldığını qeyd edib.

Bəyanatda xüsusilə Rusiyanın Ermənistanda ictimai rəyə təsir göstərmək və geosiyasi nüfuzunu qorumaq üçün müxtəlif "hibrid metodlardan" istifadə etdiyi vurğulanır. Bu çərçivədə dezinformasiya, kiberhücumlar, qeyri-qanuni maliyyələşmə və seçki prosesinə birbaşa müdaxilə cəhdləri sadalanır.

Nümayəndə heyəti həmçinin Rusiya prezidenti Vladimir Putinin Ermənistan baş naziri Nikol Paşinyana erməni diasporasının Rusiyadakı səsvermə prosesinə dəstək çağırışlarını da nümunə kimi göstərib.

Vətəndaş cəmiyyəti və Kilsə üzərindən təzyiqlər

AŞPA üzvləri hüquq müdafiəçiləri, jurnalistlər və vətəndaş cəmiyyəti nümayəndələrinin "xarici agent" damğası ilə diskreditasiya edilməsindən narahat olduqlarını bildiriblər. Onların sözlərinə görə, bu şəxslərə qarşı artan hüquqi təzyiqlər və məhkəmə iddiaları seçki mühitini zəiflədir.

Bəyanatda həmçinin Ermənistan Apostol Kilsəsinin hökumətin siyasətinə qarşı çıxaraq Rusiyaya yaxın mövqe sərgiləməsi də "misilsiz müdaxilə" kimi qiymətləndirilib.

Avropa Şurası Ermənistana xarici təsirlərə qarşı mübarizə mexanizmlərini gücləndirməyi tövsiyə edir. Sənəddə qeyd olunur ki, mövcud hüquqi baza yetərli olsa da, "örtülü və koordinasiyalı transsərhəd təhdidlərə" qarşı daha güclü institutlar və şəffaflıq lazımdır.

Seçkilər və Paşinyanın siyasi taleyi

Avropa Şurası yaxın aylarda seçkilərin monitorinqi üçün Avropa Təhlükəsizlik və Əməkdaşlıq Təşkilatı (ATƏT), Demokratik Təsisatlar və İnsan Haqları Bürosu (DTİHB) və Avropa Parlamentinin nümayəndələri ilə birlikdə missiya göndərəcəyini açıqlayıb.

İyunun 7-də keçiriləcək seçkilər Ermənistanın siyasi gələcəyi üçün həlledici hesab olunur. Baş nazir Nikol Paşinyan 2018-ci ildən hakimiyyətdədir və üçüncü müddətə namizədliyini irəli sürür.

Son illərdə Ermənistan Avropa İttifaqına yaxınlaşma xətti götürüb və Rusiyanın təsirindən uzaqlaşmağa çalışır. Mayın əvvəlində İrəvanda keçirilən Ermənistan-Avropa İttifaqı sammiti də tərəflər arasında daha dərin tərəfdaşlıq barədə razılaşma ilə yadda qalıb.