"Livan öz suverenliyinin bərpası mərhələsinə keçir" - Prezident Cozef Aun

"Biz artıq kiminsə oyununda fiqur deyilik və başqalarının müharibə meydanı olmayacağıq..."

Livan prezidenti Cozef Aun bəyan edib ki, Livan onilliklərdən sonra ilk dəfə real müstəqil qərarlar mərhələsinə daxil olur.

Moderator.az xəbər verir ki, bu barədə "israelinfo.co" nəşri məlumat yayıb.

Yeni mərhələ və suverenlik iddiası

Onun sözlərinə görə, ölkə artıq atəşkəsdən uzunmüddətli razılaşmalara keçərək ərazi bütövlüyünü və dövlət suverenliyini bərpa etməyə çalışır. Prezident vurğulayıb: "Biz artıq kiminsə oyununda fiqur deyilik və başqalarının müharibə meydanı olmayacağıq".

Aun qeyd edib ki, danışıqlar zəiflik deyil, əksinə, vətəndaşların təhlükəsizliyinə görə məsuliyyətli addımdır. Əsas hədəflər isə İsrail qüvvələrinin çıxarılması, məcburi köçkünlərin qayıdışı və ölkə üzərində tam dövlət nəzarətinin bərpasıdır.

Daxildə təzyiq və "Hizbullah"la qarşıdurma

Lakin bu kurs ölkə daxilində ciddi gərginlik yaradır. "Hizbullah" İsrail ilə mümkün danışıqlarına görə prezidentə açıq şəkildə təzyiq göstərir və xəbərdarlıq edir ki, belə addımlar onun legitimliyini sual altına qoya bilər. Qrupun nümayəndələri bildirir ki, əsas məqsəd kompromis deyil, İsrail ordusunun tam çıxarılmasıdır.

Aun isə daxili qüvvələrə sərt mesaj verərək "ölkənin taleyi ilə oynayanlara" son qoyulmalı olduğunu deyib və əlavə edib: "Hamımız eyni qayıqdayıq - o batarsa, hamımız batacağıq".

Regional fon və qeyri-müəyyən gələcək

Atəşkəs Israil ilə ABŞ-ın vasitəçiliyi ilə əldə olunub və bu, illərdən sonra ilk real siyasi dialoq imkanını yaradıb. Hətta Donald Tramp yaxın günlərdə tərəfləri Vaşinqtona dəvət edə biləcəyini bildirib.

Buna baxmayaraq, Livan daxilində fikir ayrılığı qalır: bəzi qüvvələr danışıqları çıxış yolu sayır, digərləri isə bunu "təslimçilik" kimi qiymətləndirir. Nəticədə ölkə həm suverenlik uğrunda yeni mərhələyə qədəm qoyur, həm də daxili parçalanma riski ilə üz-üzə qalır.