Qəzza bölgəsində hamının gözləri önündə baş verən soyqırım bütün bəşər tarixinə rüsvayçılıq kimi daxil olub.

 

Moderator.az xəbər verir ki, bu barədə Türkiyə prezidenti Rəcəb Tayyib Ərdoğan Albaniya və Serbiya səfərlərindən geriyə dönərkən təyyarədə jurnalistlərin suallarını cavablandırarkən bəyan edib. Məlumatı "Anadolu" agentliyi yayıb.

 

Türkiyə lideri qeyd edib ki, İsrail regional və qlobal dünya üçün ən gerçək təhlükədir, bütün dünyada sülhü qorumaq məsuliyyətini öz üzərinə götürmüş dünya liderləri

bu təhlükəyə son qoymalıdır.

 

"İsrail adlı sionist terrorçu təşkilatını dəstəkləyənlər bu rüsvayçılığın izlərini nəsildən-nəsilə daşıyacaq", - Ərdoğan bəyan edib.

 

Bu zaman Ərdoğan qeyd edib ki, "Netanyahu və onun bandasının arzuları kabusa çevriləcək, Fələstin isə Livan kimi azadlığa qovuşacaq".

 

Bundan başqa Türkiyə prezidenti dünya ictimaiyyətinin diqqətini İsrailin bütün regionda sabitliyi pozan addımlarına yönəldib.

 

"İsrail hədəflər kimi seçdiyi Fələstin və Livanda sabitliyi pozmaqla yanaşı, orada meydana çıxan alovun bütün regiona təsir göstərməsinə nail olmağa cəhd göstərir. Biz bunu görməzdən gələ bilmərik. Biz bütün bunlardan xəbərdarıq və rahat oturmamışıq. Əlbəttə ki, bizim hökumətimiz cəmiyyətimizə təhlükə törədən bütün mümkün risklərin aşkar edilməsi və aradan qaldırılması üzrə səylər göstərir".

 

"İsrailin təcavüzünü görməzdən gəlmək olmaz. Türkiyə xüsusi xidmət orqanlarının sayəsində biz İsrailin Türkiyəyə qarşı atdığı və ya ata biləcəyi A-dan Z-yədək istənilən addımları nəzarət altında saxlayırıq", - Ərdoğan məlumat verib.

 

Türkiyə lideri ayrıca olaraq britaniyalı musiqiçi Rocers Uotersə və Yunanıstanın sabiq iqtisadiyyat naziri Yanis Varufakisə Qəzzada baş verənlərlə bağlı aydın və dürüst ifadə etdikləri mövqelərinə görə minnətdarlıq edib. 

 

"Siz Qəzzada soyqırımın ildönümünə həsr edilən video paylaşaraq dünyanın diqqətini bəşəriyyət naminə tarixin doğru tərəfində dayana bilməyənlərin rüsvayçılığına cəlb etmisiniz", - Türkiyə prezidenti Uoters və Varufakisə müraciət edib.

 

"Siz həmçinin kommunikasiya vasitələrindən düzgün istifadə edərək mühüm məlumat vermisiniz. Biz kütlələri nə qədər geniş əhatə edəriksə, dinc insanları qətlə yetirənləri bir o qədər tez dayandıra bilərik, habelə ictimai rəyi səfərbər də bilərik", - o, deyib.

 

"Qəzzadakı soyqırım hamının gözləri önündə baş verib və bəşər tarixində ən böyük rüsvayçılıqlardan biri olub, - Ərdoğan vurğulayıb. - Biz qanun və diplomatiya əsasında İsrailin məsuliyyətə cəlb olunması üçün bütün zəruri olanları etməkdə davam edəcəyik".

 

Xəbər verildiyi kimi, bundan öncə Nikaraqua prezidenti Daniel Orteqa hökumətə İsrail ilə diplomatik münasibətləri kəsmək tapşırığı verib. Buna səbəb olaraq İsrailin Fələstin xalqına qarşı qəddar və cinayətkar hərəkətləri göstərilib.

 

Nikaraqua Milli Assambleyanın qəbul etdiyi Bəyannamədə qeyd edilir ki, "İsrail hökuməti Şimali Amerika və Avropa ölkələrinin dəstəyilə bütün dünyada sülh və təhlükəsizliyi təhlükə altına atır".