“Körpənin həyatını xilas etmişdi” – Həmin həkimlə bağlı təsirli sözlər

Bizi sosial şəbəkələrdən izləyin:

Həkim yoldaşı Milli Onkologiya Mərkəzində partlayış nəticəsində xəsarət alan və beyin ölümü keçirən həkim Asif Nəsirli ilə bağlı təsirli paylaşım edib.

Həmkarı Şahin Məmmədov A. Nəsirli ilə illər öncə həyata keçirdiyi bir proseduru danışıb:

“Milli Onkologiya Mərkəzinin uşaq korpusu təzə açılmışdı. Ora ilk təyin olunan anestezioloq mən olmuşdum o vaxt. Və 3 il uşaq onkologiyasında uşaq anestezioloq reanimatoloqu işləmişəm. Uşaqları çox sevdiyimdən işə başladığım ilk gündən hər dəfə onkoloji uşaq gələndə həddən artıq pis olurdum. Digər həkimlər kimi. Hətta dözə biləcəyimə, psixoloji davam gətirəcəyimə əmin deyildim.

Təxmini 2 həftə olardı işləyirdim ki, çox şirin bir uşaq gətirdilər həkimlər otağına. Qız uşağı idi təxmini 7-8 aylıq. Anası ağlamaqdan süstləşmişdi, səsi batmışdı. İranda müayinələr olunmuşdu, orada müalicəsi mümkün olmamışdı. Uşağı götürüb qucağımızda biraz oynatdıq, əzizlədik. Həmin vaxt onkoloq həkimlər müayinə kağızlarını araşdırırdı. Məlum oldu ki bu şirin körpədə uzunsov beyində, düz ürək damar və tənəffüs mərkəzinin üstündə bədxassəli şiş var.

İrandakı və Azərbaycanda bir çox neyrocərrahlar baxmışdı, əməliyyatın qeyri mümkün olduğunu bildirmişdi. Riskli zona olduğu üçün heç bir cərrahi əməliyyat mümkün deyildi.

Otaqdakı həkimlər həddən artıq pis olmuşdu. Bu körpəyə kömək edə bilməyəcəyimizə görə, çarəsizlik hissi şəxsən mənə böyük bir stress yaşatdı. Körpə isə bizə baxıb gülümsəyir, dünyadan xəbəri yox idi.. Bu şişlə bir iki ay ömrü qalmışdı.

Uşaq üzrə xüsusi ixtisaslaşmış şüa terapevti Asif Nəsirlini konsiliuma çağırdılar. Mən həmin vaxt bu cavan, mehriban həkimi ilk dəfə görürdüm. Hamımız nəfəsimizi saxlayıb onun nə deyəcəyini gözləyirdik. MRT plyonkalarına diqqətlə baxdı, dedi köməklik etmək mümkündür. Onun optimist cavabından sonra xeyli ümidləndim, sevindim. Məndən şüa terapiyası stolunda təxmini 15 gün ard-arda narkoz verə biləcəyimi soruşdu. Məndən tələb o oldu ki, hər dəfə uşaq qətiyyən tərpənməməlidir. Şüa dəqiqliklə uzunsov beyinin üzərindəki şişə fokuslanmalı idi. Azca hərəkət hədəfdən kənar toxumaların- həyati vacib mərkəzlərin zədələnməsinə səbəb ola bilərdi.

Mən hazırlğıma başladım, səhəri gün uşağa ilk venadaxili sedasiya verdim. Çox riskli idi, çünki elə doza seçməli idim ki, həm uşaq dərin yatsın, həm də o dərinlikdə olmasın ki, tənəffüsü pozulmasın. Əlavə çətinlik o idi ki, mən uşağı yatırdandan sonra otağı tərk etməli idim.

2 həftədən çox hər gün səhərlər bu uşağı anesteziya etdim şüa otağında. Asif Nəsirli isə həm mürəkkəb radiotexnika ilə işləyir, şişin üzərinə şüa verirdi, həm də mənə anesteziyada köməklik edirdi. Onunla birgə ilk dəfə həmin otağa kamera qoyduq, kameranı monitora tərəf çevirdik ki, uşağı otaqdan kənarda izləyə bilim.

Qısaca deyim, bu ilk uşaq xəstə idi şüa mərkəzində sedasiya edirdim. Əziyyətimiz hədər getmədi. Həmin qız sağaldı. Şiş tamamilə yoxa çıxdı. Asif Nəsirli o balaca körpənin həyatını xilas etmişdi.

İşlədiyi 18 il ərzində yüzlərlə uşağa şüa müalicəsi tətbiq etdi. Çox savadlı idi, dəfələrlə ondan məsləhətlər almışam, tam təmənnasız kömək edib. Kimləri onun yanına göndərmişdim, hamısı yerlə göy qədər ondan razılıq edirdi. Asif Nəsirli çox mehriban, sadə, işgüzar həkim idi. Kollektivin sevimlisi idi. Bütün onu tanıyanlar təsdiqləyər o necə humanist, dəyərli biri idi. Heyf. Azərbaycan xalqı belə gözəl həkimi itirdi”.