Allahverdi Bağırovun xilas edə bilmədiyi həmin o əsir

Bizi sosial şəbəkələrdən izləyin:

1992-ci ilin fevralın 26-na keçən gecə baş verən Xocalı faciəsi Azərbaycan tarixində ən ağır və faciəli səhifələrdən biri kimi yadda qalıb. Bu hadisə yüzlərlə insanın həyatına son qoymaqla yanaşı, sağ qalanların taleyində də dərin izlər buraxdı.

Moderator.az xəbər verir ki, həmin gecə əsir götürülən və bu günədək taleyi məlum olmayan şəxslərdən biri də Ülfət İman oğlu Əliyevdir.

1972-ci ildə Xocalı şəhərində anadan olan Ülfət Əliyev faciə baş verən zaman minlərlə sakin kimi şəhəri tərk edərək Ağdam istiqamətində qaçmağa məcbur qalmışdı. Qarlı meşələrdə üç gün davam edən ağır və təhlükəli yolçuluqdan sonra təxminən 180-200 nəfərlik bir qrup istiqaməti səhv salaraq Dəhraz kəndi ərazisinə daxil olur. Onlar buranı təhlükəsiz Gülablı kəndi hesab etsələr də, əslində mühasirəyə düşmüşdülər.

Şahidlərin ifadələrinə görə, əsir götürülən sakinlər kənddə yerləşən fermada saxlanılıb. İki gün sonra isə onların arasından 13 sağlam gənc seçilərək naməlum istiqamətə aparılıb. Ülfət Əliyev də həmin gənclərdən biri idi. Bu hadisə bir neçə şahidin gözü qarşısında baş verdiyi üçün müxtəlif ifadələrdə təsdiqini tapıb.

Əsirlikdən azad olunmuş şəxslərin verdiyi məlumatlara görə, aparılan gənclər sonradan Xankəndi şəhərinə, oradan isə Yerevan istiqamətinə göndərilib. Digər məlumatlarda isə Ülfət Əliyevin Spitak şəhərində yerləşən hərbi hissələrdən birində saxlanıldığı qeyd olunur.

Həmin dövrdə Ağdam taborunun komandiri, Azərbaycanın Milli Qəhrəmanı Allahverdi Bağırov əsirlərin azad olunması üçün ciddi səylər göstərmiş, qarşı tərəflə danışıqlar aparmışdı. Lakin onun bütün cəhdlərinə baxmayaraq, bəzi əsirlərin, o cümlədən Ülfət Əliyevin taleyi ilə bağlı müsbət nəticə əldə olunmadı.

Ülfət Əliyevin sonrakı taleyi bu günə qədər naməlum olaraq qalır. Onun kimi itkin düşmüş onlarla insanın aqibəti həm ailələri, həm də cəmiyyət üçün açıq yara olaraq qalmaqdadır.

Xocalı faciəsi yalnız bir gecənin faciəsi deyil – bu, həm də illərlə davam edən itki, ağrı və gözləmə hekayəsidir. Ülfət Əliyevin taleyi isə bu faciənin hələ də cavabsız qalan suallarından biridir. /Musavat.com/