2014-cü il martın 14-də Vətəndaş və Inkişaf Partiyası (VİP) Mərkəzi Aparatının genişləndirilmiş tərkibdə iclası keçirilib. Bu barədə Moderator.az-ı VİP-in mətbuat xidməti məlumatlandırıb. Məlumata görə, iclasda ölkədəki ictimai-siyasi vəziyyət, vətəndaşların mülkiyyət və fəaliyyət hüquqlarının pozulması, Rusiyanın Ukraynaya hərbi təcavüzü və hökumətin Milli Məclisdə təqdim etdiyi hesabat müzakirə olunub.
Ölkədəki mövcud durumu dəyərləndirən VİP sədri Əli Əliyev hakimiyyətin hələ də əsaslı islahatlara başlamaq niyyətinin görünmədiyini, hökumətin əsədyönlü siyasəti nəticəsində bütün sferalar üzrə vəziyyətin normallaşmaq əvəzinə daha da pisləşdiyini qeyd edib. Prezident seçkilərindən sonra müxalifət daxilində pərakəndəliyin dərinləşdiyini vurğulayan VİP sədri bu amilin hökuməti öz reaksion siyasətini sürdürməyə sövq etdiyini bildirib.
Bu məsələ ətrafında müzakirələrə qatılan iclas iştirakçıları ölkədəki vəziyyətin dəyişdirilməsi üçün müxalifət daxilində yeni real və səmimi təşəbbüslərə ehtiyac olduğunu önə çəkiblər.
İclasda paytaxt Bakının “Sovetski” adlanan və geniş ərazini əhatə edən məhəlləsinin sökülməsinə qərar verən, lakin köçürüləcək əhaliyə real bazar qiymətlərinə uyğun kompensasiya verməkdən boyun qaçıran hökumətin bu fəaliyyətinin ölkədə sosial partlayış üçün yeni zəmin hazırladığı qeyd olunub. Eyni zamanda, metropoliten ərazisində xırda ticarətlə məşğul olan sahibkarların fəaliyyətininə imkan verilməməsi də ölkədə gərginliyin süni surətdə artırılmasına hesablanmış məqsədli plan kimi qiymətləndirilib.
Rusiyanın Ukraynaya hərbi təcavüzünü pisləyən VİP Mərkəzi Aparatının üzvləri Azərbaycan hakimiyyətinin bu məsələdə susqun və ifrat ehtiyatlı mövqeyini tənqid ediblər. Rəsmi Bakının bu məsələdə Ukraynaya açıq və birmənalı şəkildə dəstək verməsinin və Qərbin Rusiyanın yerində oturdulması planlarını müdafiə etməsinin zəruriliyi diqqətə çatdırılıb.
Daha sonra Azərbaycan Nazirlər Kabinetinin 2013-cü ilə aid fəaliyyətinə dair Milli Məclisdə təqdim olunan hesabatı dəyərləndirən müzakirə iştirakçıları baş nazir Artur Rasizadənin bununla əlaqədar 20 dəqiqəlik çıxışını “texniki sənəd” adlandırıblar. Baş nazirin ölkə iqtisadiyyatında sürətli “böyümə”nin davam etdiyini isbatlamaq üçün səsləndirdiyi rəqəmlərin reallıqla heç bir əlaqəsinin olmadığı bildirilib.
A.Rasizadənin Ümumi Daxili Məhsul (ÜDM), kənd təsərrüfatı və sənaye məhsullarının istehsalındakı yüksəliş, əhalinin gəlirlərinin, orta aylıq əmək haqqının, təqaüdlərin artırılmasına dair təqdim etdiyi göstəricilərin bu sahələr üzrə gerçək vəziyyəti əks etdirmədiyi qeyd olunub.
Azərbaycanda işsizlər ordusunun genişləndiyi bir vaxtda baş nazirin “Son 10 ildə 1,2 milyon iş yeri açılıb” iddiası isə hakimiyyətin siyasi həyasızlığının bariz nümunəsi hesab olunub.
Dövlət investisiyalarının və büdcə ayırmalarının hakimiyyətdaxili qrupların maraqları əsasında müəyyənləşdiyini vurğulayan müzakirə iştirakçıları həmin layihələrin icrasına ictimai nəzarətin təşkilinə imkan verilmədiyini, bu səbəbdən milyardlarla manat həcmində büdcə vəsaitinin talandığını bildiriblər. Regionların sosial-iqtisadi inkişafına yönəlik proqramların yalnız kağız üzərində həyata keçirildiyini önə çəkən VİP Mərkəzi Aparatının üzvləri bölgələrdən Bakıya işçi axınının səngimədiyini regionlarda hər hansı pozitiv dəyişikliklərin olmaması ilə əlaqələndiriblər.
Eyni zamanda, neft sektorunun ölkə iqtisadiyyatının mütləq hissəsini təşkil etdiyi, iqtisadiyyatın müxtəlif məmur-oliqarxların monopolist nüfuz zonalarına bölündüyü, hakim siyasi komandanın “çətir”i altında olmayan vətəndaşların sərbəst iqtisadi fəaliyyətinə imkan verilmədiyi ifadə edilib.
Müzakirələrin yekununda hakimiyyətdən siyasi və iqtisadi saəhədə köklü islahatlara başlanılması, vətəndaşların konstitusion hüquq və azadlılarına hörmətlə yanaşılması və ölkədə arzuolunmaz gərginliyi gücləndirən addımlardan çəkinmək tələb olunub.