“Elə məşhurlar oldu ki, şəhidlərimizə heç 40 gün yas saxlamadılar, hətta müharibə gedə-gedə o insanlar instaqramda şəxsi paylaşımlarından qalmadılar. 1 il nə idi ki, onlar dözmədilər?! Mən 1 ildir ki, sosial şəbəkələrdə şəhidlərimizin anım və doğum günlərini paylaşıram. Düzdür, şəhidlər haqda paylaşım edəndə abunəçilərim azalır, bilmirəm niyə? Başqa nəsə paylaşanda daha çox baxış gəlir, nəinki şəhidlərə. Bu hallar məni gücdən salmır, əksinə. Hətta məni qınadılar ki, daha müharibə bitdi də, nə qədər eyni mövzu haqda paylaşım edirsən? O insanlara bir söz dedim ki, sizə ar olsun! Mən şəhidlərin hər birini özümə doğma sayıram. İndi rahat yaşamağımızı kimə borcluyuqsa bunu sadəcə anlamaq lazımdır. Oldu-keçdi deyə düşünməyək, onları yad etmək hamının borcudur. Bunu özümə borc bilirəm. Mən hələ də şəhidlərimizi unuda bilmirəm. Ola bilsin ki, mən hələ 1 il də səhifəmdə şəhidləri paylaşım. Mənim çox tanışlarım müharibədə iştirak etdi, amma içlərində şəhid olan olmadı. Elə adam ola bilər, düşünər ki, yəqin doğması şəhid olub, ona görə şəhidləri yad edir. Xeyr, mən onların hamısını özümə doğma sayıram. Bir il əvvəl ilk şəhidlərin fotosunu instaqram səhifəmdə paylaşanda qeyd etdim ki, heç kim deməsin ki, Sevincin qardaşı yoxdur. Həqiqətən də mən o şəhidləri öz doğma qardaşım, əzizim kimi paylaşdım. İnsan doğuşdan belə olmalıdır, xarakter heç vaxt dəyişmir. Bu tarixi qələbəni qeyd ediriksə, onun səbəbkarlarını da yaddan çıxarmağa haqqımız yoxdur. Bizim şəhidlər üçün etdiklərimiz dənizdən bir damladır. Şəhidlik hər bir insana nəsib olmur”

 

Bunu Moderator.az-a açıqlamasında tanınmış müğənni Sevinc Musayeva deyib. O daha sonra şəhid və qazilərin problemlərini işıqlandırdığını, bu mövzulara məşhur sənətkarların laqeyd qalmasından da danışıb.

 

“Müharibədən sonra qazilərimizin, şəhid ailələrinin problemlərini görəndə dərhal işıqlandırırdım. Bu paylaşımlara isə çox yaxşı baxış sayı gəlirdi. Hətta izləyicilər deyirdilər ki, halal olsun, siz sözün düzünü deyirsiniz. Hətta bir dəfə paylaşım edəndə xalq artistlərimizin adını da çəkdim ki, siz fəxri adınızı itirməkdən qorxursunuz və xalqın artistisiniz, məmurlara bir köynək yaxınsınız. Siz xalqın dərdini məmurlara daha yaxşı çatdıra bilərsiniz, sözünüz keçərli olar. Amma siz onu ya paylaşmırsınız, ya da paylaşanda elə edirsiniz ki, nə şiş yansın, nə də kabab. Bu düzgün deyil. Əgər bu gün kiminsə hüququ pozulursa haqqa tərəf durmaq lazımdır. Amma bilin ki, o qondarma adlar sizi heç yerə çıxarmayacaq. O qondarma adlarınızı itirməkdən qorxmayın, əsas valideyninizin sizə verdiyi əsl adı itirməkdən qorxun. Müəyyən köməklikləri etmək istəyirdim, amma işləmədiyimə görə əlimdən gəlmirdi. Əlimdən gələn yalnız problemləri işıqlandırmaq idi. Kiminsə haqqı tapdanırsa ona mütləq ictimai qınaq olmalıdır. Sabah bir məmurun da haqqı tapdansa mən paylaşım edəcəyəm ki, yaxşı insan idi, amma hüququ tapdanıb. Amma içi mən qarışıq heç birimiz hüququ tapdanan məmur görməmişik, hələ ki, sadə vətəndaşların hüquqları tapdanır” deyə müğənni bildirib.