Fransanın daxili işlər naziri Jerar Darmanin Azərbaycanın Yeni Kaledoniya xalqının azadlıq mübarizəsini dəstəkləməsini tənqid edib, bunu separatizmə verilən dəstək kimi xarakterizə edib.

Bununla bağlı Moderator.az-a açıqlama verən siyasi elmlər doktoru, politoloq Cümşüd Nuriyev, Fransanın bu ittihamının məntiqə və əxlaqa zidd olduğunu vurğlayıb:

“Fransanın daxili işlər nazirinin bu ittihamı məntiqdən kənardır. Bu bəyanat əsassızdır. 30 il ATƏT-in Minsk qrupunun həmsədri olan Fransa işğalçı Ermənistanı dəstəkləyəndə Parisin ağlı harada idi? Düşünmürdü ki, nə vaxtsa onların bəd əməlləri də müzakirə mövzusu ola bilər? Dünya əkdiyini biçmə dünyasıdır. Onlar nə əkiblərsə, onu da biçirlər.

Bəli, Azərbaycanın, onun Prezidentinin yürütdüyü siyasət nəticəsində Fransa əsasətindəki xalqların hüquqlarını qorumağın vacibliyi bütün dünyanın diqqətinə çatdırılıb. Azərbaycan Fransanı bir dövlət kimi separatizmdən çəkinməyə çağırdı. Lakin Fransa bu gün də öz mövqeyindən geri çəkilmək istəmir. Bununla belə, Fransa artıq Azərbaycanın gücünü görüb.

Fransa üçün qatar gedib. Əsarət altındalkı xalqlar ayılıb və onlar öz azadlıqları, müstəqillikləri uğrunda mübarizə aparırlar. Bu mübarizə isə Azərbaycan tərəfindən dəstəklənir və bundan sonra da dəstəklənəcək”.

Seymur ƏLİYEV