Görkəmli muğam ustadı Mənsum İbrahimovun  istedadlı tələbəsi Mehranə Vəliqızı yeni bir uğura imza atıb. Bu günlərdə o  el arasında olduqca populyar olan Şirvan şikəstəsini tamamilə yeni bir  formada lentə aldırıb. İlk baxışdan diqqəti cəlb edən yeni ifanın sözləridir. Beləki, Şirvan şikəstəsini oxuyan əksər xanəndələr ustad aşıq Şakir Hacıyevin “inciməsin”  rədifli  qoşmasından istifadə etsələr də, gənc xanəndə tamamilə başqa bir yolla gedib. O, tanınmış şair Əhməd Qəşəmoğludan bu şikəstə üçün Şirvanı vəsv edən yeni mətn yazmasını xahiş edib. 

Moderator.az Mehranə xanımdan qısa bir müsahibə alıb.

- Mən özüm də Şirvanlıyam, Ucar rayonundanam. Hələ uşaq vaxtlarından qəlbimdə bu şikəstənin melodiyasına bir vurğunluq vardı. Amma hər dəfə, sözlərdə açıq-saçıqlıq olduğundan bu şikəstəni ifa etməyə utanmışam. Digər tərəfdən, Şirvan şikəstəsi adlansa da, oxunan sözlərdə Şirvana aid bir kəlmə də söz yoxdur. Ustadım Mənsum müəllimin də dostu olan hörmətli şairimiz Əhməd Qəşəmoğlunun şeirlərini şox sevirəm. Onunla birlikdə Qarabağ şikəstəsini də yeni bir ifada hazırlamışıq. Ona görə də ondan xahiş etdim ki, əgər mümkünsə Şirvan şikəstəsi üçün də yeni bir mətn yazsın. Çox şadam ki, o az bir zamanda mənim arzumu yerinə yetirdi. Şeir həm olduqca poetikdir və bir başa Şirvanı tərənnüm edir:

Ey Şirvandan söhbət açan  sübh üzü

Heç nəyi unutma, el inciməsin.

Kimsən qüdrət yox  vəsf eyləməyə

Özün vəsf eylə ki, dil inciməsin.

Tarixdə, ən ulu qədim çağlarda,

Başı buludlara dəyən dağlarda, 

Ülgüsün behişdən alan bağlarda

Qəlblər inciməsin, gül inciməsin.

Müqəddəs ruhların məskəni bu yer,

Dahi müdriklərin ölkəsi bu yer,

Muğamın da doğma nəfəsi bu yer

Elə dindir tarı, tel inciməsin.

İgidləri, gözəlləri şahanə,

Bir gözəli etdi məni divanə

Yer üzündə yox ona tay, nişanə

Qəşəmoğlu,  dövran, il inciməsin.

- Mən indi sizə dediklərimi uzun müddətdir ki, Mənsum müəllimə də deyirdim. Ona görə də, o da yeni sözlərin yazılmasına müsbət yanaşdı. İnanın ki, mən bu şikəstəni yazdıranda ən çox fikrim Mənsum müəllimin münasibətinin necə olacağının yanında idi. İfa ərsəyə gələndə ilk olaraq öz ustadıma göstərdim. Onun bəyəndiyini eşidəndə sevincimin həddi-hüdudu yox idi. Özümü böyük bir mükafat almış kimi hiss etdim. 

- Mən ilk növbədə gözəl, mahir tarzənimiz Altay Niftəliyevə təşəkkür edirəm. Məhz onun qayğısı nəticəsində bu ifa ərsəyə gəldi.