O, Almaniya Federativ Respublikası, Almaniya dövlət parlamentində təmsil olunan ilk Azərbaycan əsilli deputat olub. Tibb sahəsində tanınmış alim-həkimlərdən biridir. Üstəlik, diaspora işlərində Azərbaycanla bağlı faydalı işlərə də imza atıb.  

Moderator.az  bu bilgilərin aid olduğu şəxs  -  professor Rəhim Şmit haqqında yazını təqdim edir:

Rəhim Şmidt 1 fevral 1959-cu ildə Güney Azərbaycanda  dünyaya gəlib. Orta təhsilini 1978-ci ildə başa vurduqdan sonra ali təhsil almaq üçün Almaniyaya (AFR) gələn gənc, Yustus Libix adına Gissen Universitetində Molekulyar biologiya ixtisası üzrə təhsil alıb. 

1986-cı ildə təhsilini başa vurub, yerli elmi institutlardan birində əmək fəaliyyətinə başlayıb. 1991-ci ildə  “İLAR-viruslarının tədqiqatı və onların mayaotu tərkibləri üzərində artırılması” mövzusunda dissertasiya müdafiə edərək, elmlər doktoru alimlik dərəcəsini qazanıb. Bu doktorluq işi Qissendə təşkil olunan Virusologiya üzrə beynəlxalq konfrans materiallarında dərc olunub.

Rəhim Şmidt  1994-2003-cü illərdə əvvəlcə Rostok Universitetində, sonra isə Frankfurt şəhərindəki Yohann Volfqanq Höte adına Universitetdə ikinci ali təhsilini tibb üzrə alıb. 2004-cü il tarixindən etibarən həkim kimi fəaliyyətə başlayan alimin qısa müddət ərzində bir sıra elmi məqalə və məruzələri Avropanın populyar elmi dərgilərində dərc edilib.

Azərbaycanəsilli alim 2005-ci ildən həkimliklə paralel olaraq, həm də siyasi fəaliyyətlə məşğul olmağa başlayıb. 2011-ci ildə keçirilən parlament seçkilərində Maynts II seçki dairəsindən namizədliyini irəli sürən soydaşımız Almaniya parlamentinin deputatı mandatını qazanan ilk azərbaycan əsilli siyasətçidir. Rəhim Şmidt 2016-cı ilə qədər parlamentdə Almaniyanın Reynald-Pfalts bölgəsini təmsil edib.

Siyasətə qoşulmasına baxmayaraq, elmi fəaliyyətini də davam etdirən Rəhim bəy 2010-cu ildə Qutenberq Universitetində “İlkin tibbi yardıma ehtiyacı olan xəstələrin yardım təlabatları” mövzusunda ikinci doktorluq dissertasiyasını müdafiə edərək, tibb elmləri doktoru alimlik dərəcəsini qazanıb.

2016-ci ildən Almaniya Xristian Demokratik İttifaqı partiyasına üzv qəbul olunan həkim-siyasətçi hazırda partiya daxilində sosial, əmək, səhiyyə və demoqrafik məsələlər üzrə komitənin üzvü, həmçinin öz fraksiyasının tədqiqat və səhiyyə üzrə ixtisaslaşmış siyasi spikeri kimi fəaliyyət göstərir. Bundan əlavə, o, Partiya daxilində yaradılmış “Kimsizlər və Yoxsullarla iş üzrə Tibb Komissiyası”nın rəhbərdir. Bu qurumun üzvlüyünə qəbul edilmiş 50-dən çox həkim ehtiyacı olanlara pulsuz tibbi xidmət göstərməklə məşğuldur.

Rəhim Şmidt Almaniyada Azərbaycan diasporunun təşkilatçılarından biridir. Almaniyanın siyasi dairələrində böyük hörmətə malik şəxslərdən sayılan soydaşımız hər zaman Azərbaycan həqiqətlərinin dünyaya çatdırılması istiqamətində önəmli fəaliyyət göstərmişdir. Hətta Almaniya kansleri Angela Merkellə görüş zamanı  Dağlıq Qarabağın işğalı  haqqında ətraflı məlumat verib. Onun media ilə sıx ünsiyyətdə olması, sözügedən məsələdə əhəmiyyətli rol oynayır. 

Şmidt sosial, əmək, səhiyyə və demoqrafik məsələlər üzrə komitənin üzvü, həmçinin öz fraksiyasının tədqiqat və səhiyyə üzrə ixtisaslaşmış siyasi spikeri kimi fəaliyyət göstərir. Öz sözlərinə görə onun profil sahəsi səhiyyə siyasəti, miqrasiya siyasəti, ətraf mühit siyasəti (aqrar siyasət), tədqiqat və elmdir. Onun mövcud bacarığı ona elm, tibb, ətraf mühit və aqrar siyasət mövzusunda olan məsələləri dəyərləndirməyə və qiymətləndirməyə əsas verir. O, eyni zamandan Biqen Universitetinin nəzarət şurasının üzvüdür.

HAŞİYƏ: Mətbuatda yazılanlardan: ““Rəhim Şmidt Almaniyanın siyasi dairələrində böyük hörmətə malik şəxslərimizdəndir. Eyni zamanda, Almaniyanın Kimsizlər və Yoxsullarla bağlı Tibb Komissiyasının rəhbərdir. Orada 50-dən çox həkim heyəti var. Pulsuz tibbi xidmət göstərirlər.

Bir müddət Almaniyanın əyalət parlamentinin deputatı olub. Alman mediası ilə sıx ünsiyyəti var. Hər zaman Azərbaycan məsələsinə böyük önəm verir. Bu günlərdə də Almaniya kansleri Angela Merkellə görüş zamanı Azərbaycan, Dağlıq Qarabağın işğalı haqqında ətraflı məlumat verib“,