Azərbaycanın son illərdə əldə etdiyi nailiyyətlərin əsas memarı olan Prezident İlham Əliyev bütün sahələrdə gəncləşmə siyasəti aparır. Bu səbəbdəndir ki, gənclərin böyük qismi ölkə başçısının siyasətini dəstəkləməklə yanaşı, onlara göstərilən qayğıdan məmnunluğunu da bildirir. Artıq ölkəmiz böyük bir inkişaf mərhələsini geridə qoyub. Bu inkişaf yolunda gənclərin üzərinə də daha çox məsuliyyət düşür. Təsadüfi deyil ki, Prezident Administrasiyasının İctimai-siyasi məsələlər şöbəsinin müdiri Əli Həsənov “XƏTDƏ” Sosial Şəbəkə Akademiyasının hesabat konfransında çıxışı zamanı gənclərin ictimai-siyasi proseslərdə əsas rol oynadığını vurğulayıb: "Gənclər öz əməli fəaliyyətləri ilə Azərbaycanın inkişafına töhfə verməklə yanaşı, həm də ölkənin fəal təbliğatçıları olmalıdırlar. Xarici aləmdə, xüsusən də sosial şəbəkələrdə daha fəal olmalı, öz sözlərini deməlidirlər. O xalqın mədəniyyəti, adət-ənənələri yaşayır ki, o, güclüdür, ona sahib çıxan gəncliyi var. Siz dünyada azərbaycançılığın ən yaxşı nümunəsi ola bilərsiniz. Azərbaycan dövləti həmişə sizinlədir, sizin arxanızdadır".
Moderator.az xəbər verir ki, “Palitra”ya açıqlama verən Yeni Azərbaycan Partiyası (YAP) Gənclər Birliyinin sədri Seymur Orucov Azərbaycan dövlətinin həqiqətən də gənclərin arxasında olduğunu deyib. O, Prezidentin gənclərə göstərdiyi diqqət və qayğının YAP gəncləri tərəfindən yüksək qiymətləndirildiyini bildirib: “Təbii ki, birmənalı olaraq biz ölkə başçısının gənclərə olan diqqət və qayğısından tam razıyıq. Bu qayğı əməli işlərlə isbat olunub. Cənab Prezident gənclər üçün bütün yolları açaraq, onlara hər sahədə münbit şərait yaradıb.
Son illərdə bütün regionlarda xeyli sayda idman qurğuları və gənclər mərkəzləri inşa edilir. Bunlar liderimizin gənclərə diqqətinin əsas nümunələrindən sayılır. Prezident İlham Əliyevin yürütdüyü gənclər siyasəti dünyaya nümunədir. Xarici dövlətlər bizdən bu sahədə çox şey öyrənirlər”.
Seymur Orucov son zamanlarda gəncləri yalan vədlərlə ətrafına toplamağa çalışan müxalifət liderlərinin gülünc duruma düşdüyünü söylədi: “Müxalifət bir dəfə qarışıq vaxtlarda gəncləri aldatmağı bacardı. İndi isə, bu mümkün deyil. Gənclər “müxalifət lideri” adlandırılan insanların arxasınca hansı səbəbdən getməlidir? Onlarda liderlik vəsfi bir yana qalsın, vətəndaş mövqeyi belə, yoxdur. Bu şəxslərin heç özlərinə inamları da qalmayıb. Belə siyasətçilər hansısa gəncə necə güvən verə bilər axı? Sağlam gənclik Prezident İlham Əliyevi həmişə dəstəkləyib və onunla bir düşərgədə olub. Radikal düşərgənin yanında qalan, barmaqla sayılacaq qədər az olan gənclər də tezliklə bu şəxslərin ətraflarından dağılacaqlar”.
YAP Gənclər Birliyinin rəhbəri “Milli Şura”da toplaşan müxalifətçilərin özünə lider seçə bilməməsinə də toxunub: “Əslində onlarda lider də yoxdur ki, özlərinə kimisə lider tapıb seçələr. “Milli şura” həqiqətdə “antimilli şura”dır. Demokratiyadan, millilikdən danışırlar, amma özlərini xalqdan tam təcrid vəziyyətində saxlayırlar. Bu qurumun liderinin qeydiyyatdan keçməsi üçün hüquqi statusu da yoxdur. Birdə ki, orada liderliyə, namizədliyə layiq elə bir sima yoxdur axı... Eldar Namazov, yoxsa Rüstəm İbrahimbəyov milli dəyərlər carçısıdır? Bu şəxslərin heç biri milli dəyərlərə önəm verməyiblər. Sadəcə olaraq bu gün hamımız demokratik dövlətdə yaşayırıq deyə belə şəxslərə göz yumuruq. Mən “milli şura”nı ciddi qəbul etməmişəm və etmirəm də. Onların hər hansı bir bəyanatlarına rast gələndə, gülüb keçirəm. Bu siyasətçilər saxta, bir qrup “pensiyaçılar”dır. Öz güvənləri olmayan hansısa xarici qurumun əlaltıları olan müxalifət liderləri şübhəsiz ki, uğursuzluğa məhkumdurlar. Qısası partiyalarında olduğu kimi orada, “milli şura”da da saxtakarların yanında gəncin nə işi ola bilər axı? Bu səbəbdən onlar gənclərə də rəhbərlikdə yer vermirlər. Erməni sevdalısı Rüstəm İbrahimbəyovu kim dəstəkləyəcək ki?”.