Moderator.az bildirir ki, bu sözləri Axar.az-a Yeni Kaledoniyada baş verən proseslər haqqında danışan Cənubi Qafqaz Tədqiqatlar Mərkəzinin direktoru Fərhad Məmmədov deyib.

 

 

"Orada yerli əhali olan kanaklar və Fransadan illər əvvəl gələn vətəndaşlar birlikdə yaşayır. Hər ikisi ölkənin vətəndaşıdır, amma bura xüsusi administrativ ərazi vahidi olduğu üçün kanakların bir sıra üstünlükləri var. Makron hökuməti isə müstəqillik və s. ilə bağlı keçiriləcək referendumların nəticəsini dəyişmək üçün Fransadan gələnləri də yerli əhali kimi təqdim edir. Onlar da öz növbəsində Kaledoniyanın Fransanın tərkibində qalmasına səs verirlər. Bu mübarizə artıq uzun illərdir ki, davam edir. Eyni zamanda Yeni Kaledoniyada Fransa üçün əhəmiyyətli olan nikel yataqları var. Ərazi nikel yataqlarının böyüklüyünə görə dünyada ilk onluğa daxildir. Rəsmi Paris bu yataqları hərtərəfli şəkildə istismar edir, amma qarşılığında Yeni Kaledoniya büdcəsinə çox az ödəniş edilir".

 

 

"Kanakların mübarizəsi davam edir. Azərbaycan isə insan hüquqları baxımından Yeni Kaledoniyaya mənəvi dəstək verir. Bu dəstək Fransanı qıcıqlandırır. Ancaq Azərbaycan Fransanın öz işinə yarayanda haqqında danışdığı insan hüquqlarının müdafiəsinin qorunmasını istəyir. Rəsmi Bakı Parisdən fərqli olaraq parlamentdə hökumətə Yeni Kaledoniyanın müstəqilliyini tanımağı tövsiyə edən qətnamələr qəbul etməyib. Azərbaycan yalnız siyasi yolla insan hüquqları konteksində kanaklara qarşı zorakılığı qətiyyətlə pisləyir və bu məsələni həm də özəl təşəbbüslərlə gündəmdə saxlamağa çalışır".

 

Qeyd edək ki, Yeni Kaledoniyada etirazlar artıq bir neçə həftədir ki, səngimək bilmir. Polisin ifrat müdaxiləsi nəticəsində meydana gələn toqquşmalarda bugünədək 4 nəfər həyatını itirib, 200 nəfərdən çox etirazçı saxlanılıb, bölgəyə 200 milyon avrodan çox zərər dəyib.