"Facebook"dakı "Deputat2015" və fasilələrlə də olsa,  "Namized.az" səhfələrində parlamentin hazırki üzvləri bağlı müzakirələr davam etməkdədir. Hər iki səhifəni təşkil edənlərin özləri tərəfindən dəfələrlə xəbərdarlıq olunmasına baxmayaraq, çox zaman saxta profillər altında gizlənən bəzi fb istifadəçiləri-userlər tərəfindən qoyulan qaydalara əməl olunmur, müzakirələr əksər hallarda söyüş, təhqirlər üzərində gedir. Odur ki, həmin səhifələrdə daha bir neçə deputatla bağlı yazdığım şərhlərimi oxucularla bölüşməyi məqsədəuyğun hesab etdim:

-Çingiz müəllim-Çingiz Əsədullayev abırlı, özünə hörmət qoyan, sadə, mədəni insandır. Həm də savadlı, iqtisadiyyatı, bank sektorunu yaxşı bilən iqtisadçılardan, deputatlardandır. Plenar iclaslarda tez-tez çıxışlar etməsə də, amma sədr müavini olduğu İqtisadi siyasət komitəsinin iclaslarında hər zaman çıxşılar edir, maraqlı təkliflərini səsləndirir...Bir dəfə hətta parlamentdə keçirilən yığıncaqlardan birində indiki gənclərdən narazılığını kəskin surətdə ifadə etmişdi, onları elmə, təhsilə, biliyə, savadlanmağa daha ciddi şəkildə yiyələnməyə səsləmişdi, gəncləri zərərli vərdişlərdən uzaq olmağa çağırmışdı... Amma çox təəssüflər olsun ki, nədənsə, mətbuata, mediaya bir o qədər həvəs göstərmir, nadir hallarda mediada çıxış edir. Ondan cəmi bir dəfə-təxminən 7-8 il əvvəl 1nyus.az və "525" üçün müsahibə götürmüşdüm və çox əla bir müsahibə alınmışdı, olduqca gözəl və intellektual cavablar vermişdi, çoxlarının da xoşuna gəlmişdi...Müsahibələrim içərisində ən çox xoşuma gələnlərdən biri idi..

-Aslan Cəfərov-parlamentin ən qeyri-fəal, ən passiv deputatı...Hələ indiyənəcən onun səsini eşidən olmayıb-nə plenar, nə də komitə iclaslarında...İlk vaxtlar da jurnalistlərdən kimsə ona yaxınlaşanda "mənim aşağıda işim var (MM-in ayaqyolunu işarə edirdi), qayıdıb gəlim, danışarıq" - deyər və görünməz olardı...

-İlham Əliyev plenar iclaslarda ara-sıra çıxışlar etsə də, İqtisadi siyasət komitəsinin iclaslarında çox aktiv və fəaldır, çıxışlar edir, təkliflərini verir...Mətbuatla da əlaqələrə nədənsə o qədər maraqlı görünmür, mətbuatdan, mediadan bir az məsafəli olmağa çalışır...

-Sevinc xanım sakit, sadə, mədəni, səmimi, lakin fəal olmayan deputatlardandır

-Nəriman Əliyev...Masallıları deyə bilmərəm, amma onun parlamentdə (plenar və komitə iclaslarında) indiyədək səsini eşidən olmayıb, şəxsən mən özüm eşitməmişəm...Mətbuatdan da uzaq qaçır...Seçiciləri ilə münasibətləri nə yerdədir, onu deyə bilmərəm...

 -Muxtar Babayev parlamentdə (plenar və komitə iclaslarında) aktivliyi və fəallığı ilə seçilməyənlərdəndir. Cəmi bir-iki dəfə plenar iclasda yazılı çıxışına rast gəlmişəm...Mətbuatla, jurnalistlərlə təmasa da maraqlı görünmür...Seçiciləri ilə münasibətlərinin nə yerdən olmasından isə məlumatsızam. Təki yaxşı olsun!

-Əhməd müəllim parlamentin plenar və komitə iclaslarında (Elm və təhsil komitəsinin) mütəmadi olmasa da, ara-sıra çıxışlar edir, elmlə, təhsillə bağlı məsələlərə toxunur...Mətbuatla, jurnalistlərlə də - əksər həmkarlarından fərqli olaraq- münasibətlərə də o qədər önəm vermir, maraq göstərmir...Seçiciləri ilə əlaqələrinin nə yerdə olması barədə isə məlumatsızam. Hər halda istərdim ki, yaxşı olsun!

-Hüseynbala müəllim mənim hər zaman hörmət etdiyim Kişilərdəndir. Ona fəaliyyətində daim uğurlar!

-Əsabil müəllim deputatdan daha çox biznes adamıdır və elə biznes sahəsində fəaliyyətini davam etdirsəydi daha faydalı olardı... Hər halda mən belə düşünürəm...Biznesmenliklə siyasət, deputatlıq bir arada əksər və əksər hallarda mümkün olmur...

 -Səttar müəllim, 2000-2010-cu illərdə daha çox fəallıq və aktivlik göstərərdi, xüsusilə də, xariçi şirkətlərdə işləyən azərbaycanlıların hüquqlarının əksər zamanlarda pozulması ilə bağlı çıxışlar edər və kəskin münasibətini bildirərdi...Mətbuatla da münasibətləri normaldır...

 -Adil Əliyevin-Adil müəllimin ən böyük üstünlüyü onun Mərd və Təmənnasız İnsan olmasıdır. O, heç kimdən və heç nə də qarşılıq güdmür, gözləmir, hansı ki əksər siyasətçilər və bir çox deputatlar tam fərqli davranırlar, hər addımlarında, hər hərəkətlərində, xırda yaxşılıqlarında belə mütləq qarşılıq, təmənna güdürlər, umurlar. Adil Aliyev-Adil müəllim isə bunların fövqündə-Kişilik, Mərdlik, İnsanlıq, Təmənnasızlıq Zirvəsində dayanır. O, millət vəkili olmaqla həm də Millətinin Vəkilidir. Heç bir reklam-filan etmədən Xalqına, Dövlətinə, Millətinə sədaqətlə qulluq edir. Həm də onun ən üstün cəhəti və ya cəhətlərindən biri Türkçü olması, bundan fəxr etməsidir. Çünki belələri indiki zamanda çox azdır. Amma Adil müəllim hər zaman Türkçü olduğunu söyləyir və öz əməlləri ilə də bunu hər an isbatlayır. Adil müəllimə bundan sonrakı fəaliyyətində uğurlar arzulayır və onu 3-cü dəfə Millətinin Vəkili görmək istədiyimi səmimi qəlbdən ifadə edirəm. Hər zaman yolunuz açıq olsun, Adil müəllim!

- Rüstəm müəllim plenar iclaslarda olmasa da, üzvü olduğu Regional məsələlər komitəsinin iclaslarında daim çıxış edir və fəallıq göstərir. Bələdiyyə sahəsini də yaxşı bilən mütəxəssislərdəndir...İnsan kimi də çox sadə, mehriban, sakit təbiətli, yerini, sözü bilən, şəxsiyyətinə, insanlığına hörmət etdiyim Kişilərdəndir!